सरकारले सञ्चालन गर्दै आएको बीमा कार्यक्रम वापतको रकम अस्पताललाई नदिएपछि प्रभु इन्स्योरेन्ससंगको सहकार्यमा अस्पताल आफैले बीमा कार्यक्रम सुरु गरेको अस्पतालका कार्यकारी निर्देशक दुर्गा प्रसाइले बताए ।
‘मेरो बिएण्डसी, मेरो जीवन साथी प्रभु इन्स्योरेन्ससंग” नारा राखेर शुरु गरेको बीमा कार्यक्रमको उद्घाटन इलाममा औपचारीक रुपमा गरेको छ । अस्पतालको बीमा कार्यक्रम अनुसार एक परिवारले बार्षिक ६ हजार रुपैंयाँ तिरेपछि चारजनाले ५० हजार रुपैंयाँ सम्मको स्वास्थ्य सेवा लिन पाउनेछन् । चारजना भन्दा बढी सदस्य भएका परिवारका लागि प्रति व्यक्ति थप १७ सय ५० रुपैंयाँ लाग्ने निर्देशक प्रसाईले जानकारी दिए। यो कार्यक्रम एकबर्ष परिक्षणका लागि रहने र प्रभावकारी भएमा अन्य जिल्लाहरुमा पनि बिस्तार गरिने बताइएको छ ।
बुधबार बीमा कार्यक्रमको उद्घाटन गर्न इलाम आएका प्रसाईले इलाम अस्पताल र इलाम नगरपालिकाले सञ्चालन गरिरहेको डाइलासिस सेवा र इलाम अस्पतालको निरीक्षण गरेका छन्। सो क्रममा उनले इलाम जिल्लाको एकमात्र ठूलो सरकारी अस्पताल इलाम अस्पतालको अवस्था अत्यन्तै दयनीय रहेको बताए । प्रसाईले डाइलासिस सेवालाई अझ प्रभावकारी बनाउन बीएण्डसी अस्पतालले महिनामा एकपटक एकजना डाक्टर पठाउने प्रतिवद्धता जनाए । इलाम नगरपालिकाका मेयर केदार थापाले बीएण्डसी अस्पतालले पूर्वाञ्चलको स्वास्थ्य सेवामा महत्वपूर्ण योगदान पुर्याएको र अब सञ्चालन गर्न लागेको स्वास्थ्य बीमा कार्यक्रम पनि थप प्रभावकारी बनाउन आग्रह गरेका छन् ।
