झापा : झापामा सम्पन्न प्रथम दमक गोल्डकप फटबल प्रतियोगिताको उपाधि विभागीय टिम नेपाल पुलिस क्लबले जितेको छ ।
शुक्रबार भएको फाइनल खेलमा मनाङ–मर्स्याङ्दी क्लबलाई १–० ले पराजित गर्दै पुलिस च्याम्पियन बनेको हो ।खेलको ८८औं मिनेटमा पुलिसका रेजिन सुब्बाले सुन्दर ‘हेड गोल’ गर्दै टिमलाई प्रतियोगिताको विजेता बनाए । मनाङका गोलरक्षक विशाल श्रेष्ठ अगाडि बढेको समयमा रेजिनले बललाई जाली चुमाएका थिए ।
उपाधिसँगै पुलिसले नगद १३ लाख ११ हजार रुपैयाँ प्राप्त गरेको छ । उपविजेता बनेको मनाङले ६ लाख ११ हजार रुपैयाँमा चित्त बुझायो । खेलको ‘म्यान अफ दी म्याच’ पुलिसका अभिषेक रिजाल घोषित भए । उनले ११ हजार रुपैयाँ पाए ।
किरण चेम्जोङ उत्कृष्ट खेलाडी
प्रतियोगिताको उत्कृष्ट खेलाडी पुलिसका गोलरक्षक किरण चेम्जोङ घोषित भए । उनले एउटा अपाचे मोटरसाइकल प्राप्त गरे ।
प्रतियोगिताका उत्कृष्ट प्रशिक्षक घोषित पुलिसका अनन्त थापा, उत्कृष्ट डिफेन्डर पुलिसका सन्तोष हेमरन, उत्कृष्ट मिडफिल्डर मनाङका सुजल श्रेष्ठ र उत्कृष्ट स्ट्राइकर घोषित पुलिसका रेजिन सुब्बाले जनही २५ हजार रुपैयाँ प्राप्त गरे ।
सर्वाधिक गोलकर्ता समान ३ गोल गर्ने आर्मीका नवयुग श्रेष्ठ, एपीएफ क्लबका हरि कार्की र मदन भण्डारी स्पोर्टस् एकेडेमीका म्याक्स ओलावालेलाई नगद २५ हजार रुपैयाँ तीन भाग लगाएर वितरण गरियो ।दमक नगरपालिकाले आयोजना गरेको प्रतियोगितामा ‘ए’ डिभिजनका टिमसहित १० टोली सहभागी थिए ।
