चुलाचुली (इलाम) : चुलाचुली स्थित राष्ट्रप्रेमी माध्यमिक विद्यालय फुङनामले बहुमूल्य धातुबाट निर्मित सरस्वतीको मूर्ति प्राप्त गरेको छ। नेपाली कांग्रेस इलामका सभापति तथा युवा समाजसेवी डम्बर बहादुर खड्काले चुलाचुली वडा न ६ स्थित विद्यालयलाई उक्त मूर्ति प्रदान गरेका हुन्।
खड्काले शिक्षक अभिभावक संघका अध्यक्ष गोपाल राई र प्रधानाध्यापक कृष्ण कुमार राईलाई मूर्ति हस्तान्तरण गरेका हुन । उनीहरूले मूर्ति विद्यालयको प्रार्थना–कक्षमा राखिने जानकारी दिए।
प्रधानाध्यापक कृष्ण कुमार राईका अनुसार मूर्ति प्राप्ति विद्यालयका लागि शैक्षिक प्रेरणा र सांस्कृतिक उन्नतिको महत्वपूर्ण उपलब्धि हो। “ज्ञान, कला र सिर्जनशीलताको प्रतीक सरस्वती मूर्तिले विद्यार्थीमा अध्ययनप्रति थप उत्साह जगाउनेछ,” उनले भने।
युवा समाजसेवी डम्बर बहादुर खड्काले विद्यालयको विकास र विद्यार्थीको मनोबल अभिवृद्धिमा आफ्नो सहयोग सानो भए पनि अर्थपूर्ण हुने विश्वास व्यक्त गरे। उनले स्थानीय शैक्षिक संरचनालाई सुदृढ बनाउनु सामुदायिक दायित्व भएको टिप्पणी गरे।
उक्त हस्तान्तरणसँगै विद्यालयका शिक्षक, अभिभावक र विद्यार्थीले समाजसेवी खड्काप्रति आभार व्यक्त गर्दै सहयोगले गाउँको शिक्षामा सकारात्मक प्रभाव पार्ने विश्वास व्यक्त गरेका छन्।
