इलाम : इलामको सन्दकपुर गाउँपालिका-४ माबुमा निर्माण गरिएको किरात धर्मावलम्बीहरुको माङहिम (मन्दिर) उद्घाटन गरिएको छ ।
राष्ट्रिय विभूति फाल्गुनन्द लिङदेनको १४० औं जन्मजयन्तीको अवसरमा आज (आइतबार) माबुमा आयोजित कार्यक्रममा माङहिम उद्घाटन गरिएको हो । माङहिमको किरात धर्मगुरु आत्मानन्द लिङदेनले उद्घाटन गरेका हुन् ।
सन्दकपुर गाउँपालिकाको १८ लाखसहित स्थानीय भक्तजनहरुको एक करोड बढीको लागतमा माङहिम निर्माण गरिएको निर्माण समिति सचिव बिबीहाङ साउदेनले जानकारी दिनुभयो ।
यसैबिच सोही ठाउँमा निर्माण गरिएको समाज सुधारक राष्ट्रिय विभूति फाल्गुनन्दको पूर्ण कदको सालिक समेत अनावरण गरिएको छ । धर्मगुरु लिङदेनले सालिक अनावरण गरेका हुन् ।
