इलामेली समाज दक्षिण कोरियाको अध्यक्षमा फाकफोकथुमका थेगिम

  युद्धबहादुर बोहोरा
1.1k Shares

इलामः वैदेशिक रोजगारीको सिलशिलामा दक्षिण कोरिया पुगेका इलामेहरुको संस्था इलामेली समाज दक्षिण कोरियाको अध्यक्षमा फाकफोकथुम गाउँपालिकाका टिका थेगिम निर्वाचित भएका छन् ।

संस्थाको असार २५ गते (१० जुलाई २०२२) मा सम्पन्न चौथो अधिवेशनबाट थेगिमको नेतृत्वमा १६ सदस्यीय समिति गठन भएको छ भने पहिलो वैठकबाट उपाध्यक्ष पदका दुई जना चुनिने भएका छन् ।

समितिको वरिष्ठ उपाध्यक्ष दिप गुरुङ,उपाध्यक्ष देशबहादुर लिङ्देन,महासचिव सुरेश रिजाल,सचिव भिम विराज शंकर,कोषाध्यक्ष भवानी घिमिरे र सहकोषाध्यक्ष मदन चापागाईंलाई जिम्मेवारी दिइएको छ । त्यस्तै, सदस्यहरुमा आशिष शाह,सुवाश चेम्जोङ,डिल्ली हाङ् सुब्बा,सुनिल गुरुङ,गणेश तामाङ,छत्र राई र तिर्थ लुईटेल निर्वाचित भएको अधिवेशनका निर्वाचन मण्डल संयोजक प्रतिक बोहोराले जानकारी दिए ।  निर्वाचन मण्डलका अन्य सदस्यमा केदार निरौला,पवित्रा थेवे,खोम गुरुङ,कमल राई,महेश थापा र दावा फिन्जो तामाङ रहेका थिए ।

“सुर्योदय र हरियाली इलामेलीहरुको पहिचान,पर्यटन प्रवर्धन र समाजसेवा हाम्रो अभियान” भन्ने नारा सहित वैदेशिक रोजगारीका क्रममा देश बाहिर रहेपनि स्वदेशमा हुने राम्रा काम र समस्यामा परेका नेपालीलाई सहयोग गर्ने संस्थाको लक्ष्य अनुसार सन् २०१४ मा स्थापना गरिएको हो । संस्थाका संस्थापन अध्यक्ष हरि प्रसाद खनालपछि मन्जु लावती र दर्पण गुरुङ  दोस्रो अधिवेशनमा अध्यक्ष बनेका हुन् भने यसअघिको तेस्रो अधिवेशनमा केदार निरौलाले पद सम्हालेका थिए ।

इलाम जिल्लाका पाँच सय भन्दा बढी युवाहरु कोरियामा कार्यरत रहेको र यस समाजले विरामीहरुलाई उपचार सहयोग,कोरोना महामारी,दैवी प्रकोप,आपतकालीन समय सहयोग,राष्ट्रिय आविष्कार केन्द्रलाई सहयोग गरेको छ । आर्थिक सहयोग जुटाउने अभियान चलाउन अगुवाईको भूमिका निर्वाह गरेका अध्यक्ष थेगिमले विभिन्न म्युजिक भिडियो समेत बनाएका छन् । कोरिया एक दशक कार्यरत उनले इलाम जिल्लाका विभिन्न सुन्दर ठाँउहरुको छायांकन गरिएको  म्युजिक भिडियो निर्माण गर्दै ओझेलमा परेका प्राकृतिक पर्यटकिय गन्तव्यहरु दर्शकका नजरमा पुर्‍याउन खोजेका छन् ।

किराँत याक्थुङ चुम्लुङ कोरियाको निवर्तमान कोषाध्यक्ष,समाजको समितिमा आवद्ध भइ काम गरेका उनी इलाम फाकफोकथुम-१ निवासी हुन् । सामाजिक कार्यमा पनि अग्रसर थेगिमले व्यक्तिगत रुपमा  बाढी पीडित,आगलागी भइ क्षति भएको परिवारलाई,विद्यालय,खेलकुद क्षेत्र साथै निम्न आर्थिक अवस्था भएका विरामी र समस्यमा परेका साथीहरुलाई सहयोग गर्दै आएका उनले बताए ।

विभिन्न क्षेत्रमा अभिरुचि राख्ने उनी सामाजिक अभियान्ताको रुपमा चिनिएका छन्  । विगत आधा दशकदेखि निरन्तर गीत संगीतमा सक्रिय भूमिका निर्वाह गर्दै ‘ढकमक्क गुराँस फुल्यो’ भन्ने बोलको गीत साथै उनको शब्द रचनामा ‘घुम्नलाई जाउ इलाम’ नामक म्युजिक भिडियो पनि बनाएका छन् ।

हाल नेपालका हरेक जिल्लाबाट कोरिया पुगेका नेपालीले समाज गठन गर्दै आफ्नो गाउँठाउँमा समस्या पर्दा सहयोग गर्दै आएका छन् ।

तपाईको प्रतिक्रिया

सम्बन्धित समाचार