फाकफोकथुम : इलामको फाकफोकथुम गाउँपालिका–३ रातमाटेका रणबहादुर थेगिमको परिवारलाई नेपाल रेडक्रस सोसाइटीबाट आज राहत वितरण गरिएको छ ।
दुई दिन अघि वर्षासँगै परेको चट्याङले घर जल्दा थेगिमको दुई लाख १५ हजार बराबरको क्षति भएको थियो ।
नेपाल रेडक्रस सोसाइटीका आजीवन सदस्य दिपेन्द्र प्रसाद पराजुलीको नेतृत्वमा रेडक्रसका आजीवन सदस्यहरू कृष्णप्रसाद लुईटेल, उद्वव लामिछाने, भजिन्द्र लामिछाने, देउकुमार थापा, मनबहादुर खजुमलगायतको टोलीले त्रिपाल, भाडावर्तन, कम्मल, लत्ताकपडा हस्तान्तरण गरेको हो । पीडितलाई फाकफोकथुम गाउँपालिकाले समेत राहत सहयोग गर्ने भएको छ । पीडित परिवार अहिले अस्थायी टहोरोमा दिन बिताईरहेका छन् ।
चट्याङ लागेर एक तले फूसको छानासहितको घरको आंशिक भाग जलेर नष्ट भएको थियो ।
