झापा : क्यामरुनको दाउफिन्स फुटबल क्लब चौथो झापा गोल्डकप फुटबल प्रतियोगिताको सेमिफाइनलमा प्रवेश गरेको छ ।
बिहीबार रुपन्देही–११ लाई २–० ले पराजित गर्दै दाउफिन्स अन्तिम चारमा पुगेको हो ।
बिर्तामोडस्थित डोमालाल राजवंशी रंगशालामा सम्पन्न अन्तिम क्वार्टरफाइनल खेलमा दाउफिन्सले पहिलो हाफ र दोस्रो हाफमा एक/एक गोल गरेको थियो ।
डीबक्समा दाउफिन्सका मेस्सोउलिए ओलोमोलाई रुपन्देहीका डिफेन्डर पेपीले लडाएपछि रेफ्रीले पेनाल्टी दिएका थिए ।
खेलको ४०औं मिनेटमा सोही अवसरलाई सदुपयोग गर्दै दाउफिन्सका पेट्गाले बललाई जाली चुमाउँदै टिमलाई अग्रता दिलाए ।
खेलको ८५औं मिनेटमा दाउफिन्सका मेस्सोउलिए ओलोमाले गोल गरेपछि टिमले २–० को जित दर्ता गर्यो ।
ओलोमाले डीबक्स एरियानजिकैबाट गरेको प्रहार गोलमा परिणत भएको थियो ।
ओलोमा खेलको ‘म्यान अफ दी म्याच’समेत घोषित भए । उनले नगद १५ हजार रुपैयाँ प्राप्त गरे ।
दाउफिन्सले अब सेमिफाइनलमा विभागीय टिम त्रिभुवन आर्मी क्लबसित प्रतिस्पर्धा गर्नेछ ।
प्रतियोगिताअन्तर्गत् शुक्रबार हुने पहिलो सेमिफाइनल खेलमा आयोजक झापा–११ र थ्रीस्टार क्लब आमने–सामने हुनेछन् ।
