इलाम : प्रेस सेन्टर नेपाल इलामको सिफारिसमा सहिद स्मृति प्रतिष्ठान इलामले विगत ३ वर्षदेखि वितरण गर्दै आएको जनयुद्धका सहिद पत्रकार ‘शशीकला स्मृति पत्रकारिता पुरस्कार-२०८१’ पत्रकारद्वय रोशन काफ्ले र खेमराज ढकाल पुरस्कृत भएका छन् ।
संविधान दिवसको अवसरमा बिहीबार इलाम सदरमुकाममा आयोजित कार्यक्रममा पत्रकारद्वय काफ्ले र ढकाल पुरस्कृत भएका हुन् । पुरस्कारको राशी जनही सात/सात हजार रहेको छ ।
पुरस्कृत द्वयलाई संस्थाका सल्लाकार टीका घिमिरे, अध्यक्ष धिरेन्द्र शर्मा रमणले दाेसल्ला र सम्मान पत्रले सम्मान गरेका थिए ।
कार्यक्रममा प्रतिस्ठानकाे उपाध्यक्ष उर्मिला तामाङले शशिकलाकाे हुन भन्ने चिनाउँदै उनले देशकाे परिवर्तनकाे लागि दिएकाे याेगदानकाे चर्चा गर्दै स्वागत मन्तव्य राखेकी थिइन ।
सहिद स्मृति प्रतिष्ठान इलामका अध्यक्ष धिरेन शर्मा रमणकाे अध्यक्षतामा भएकाे कार्यक्रममा नेपाल पत्रकार महासंघ इलाम अध्यक्ष विप्लव भट्टराईले शुभकामना मन्तव्य राखेका थिए ।
१० वर्षे जनयुद्धका क्रममा सहादत प्राप्त गरेका सहिदहरुको नाममा स्थापित प्रतिष्ठानले तीन वर्ष अघि सहिद पत्रकार शशीकला शर्माको स्मृतिमा सो पुरस्कार स्थापना गरेको थियो । यसअघि सो पुरस्कार इलामका लेखक/पत्रकार रीता राराहाङ, नाटककार/पत्रकार चेतन आङ्थुपो र पत्रकार भगीरथ भण्डारीले पाइसकेका छन् ।
तत्कालिन क्रान्तिकारी पत्रकार संघमा आवद्ध शर्मालाई जनयुद्धका बेला २०६० असोज २६ गते तत्कालिन शाही सेनाले इलाम नगरपालिका-३ पुवामझुवामा गोली प्रहार गरी हत्या गरेका थिए । शर्मा तत्कालिन देउमाई गर्जन पत्रिकाका सम्पादकका साथै नेकपा (माओवादी) की जिल्ला सदस्य र अखिल नेपाल महिला संघ (क्रान्तिकारी) की केन्द्रीय सदस्य थिईन् ।
उनकै नामबाट शहिद स्मृति प्रतिष्ठानले पत्रकारिता पुरस्कार स्थापना गरेको हो । जनयुद्धको क्रममा इलाममा माओवादीतर्फ ८६ जनाको हत्या भएको थियो ।
