इलाम : कंचनपुरकी निर्मला पन्तको हत्याराको कारवाहिको माग गर्दै नेत्रविक्रम चन्द नेतृत्वको नेपाल कम्युनिष्ट पार्टीले इलाममा आइतबार जनप्रदर्शन गरेको छ ।
निर्मलाको बलात्कारपछि हत्या भएको ४ महिना वितिसक्दा समेत सरकारले दोषी पत्ता लगाउन नसकेको भन्दै नेपाल कम्युनिष्ट पार्टी इलामले हत्याराको तत्काल पहिचान गरी कारवाहीको माग गर्दै जनप्रदशर्न गरेको छ ।
इलामको ठूलो टिँडखेलबाट नाराबाजीसहित सुरु भएको र्याली इलाम चोकबजारमा पुगेर कोणसभामा परिणत भएको थियो । कोणसभालाई नेपाल कम्युनिष्ट पार्टीका मेची व्युरो कार्यालय सदस्य जनपरिषद नेपालका केन्द्रीय सदस्य होम खतिवडा ‘विद्रोही’ ले सम्बोधन गरेका थिए ।
कोणसभालाई सम्बोधन गर्दै विद्रोहीले ४ महिनासम्म पनि हत्यारा पत्ता लगाउन नसक्ने दुई तिहाइको सरकार जनतासामू नालायक सावित भइसकेको दावी गरे । ‘घटना भएको यत्तिका दिन बितिसक्यो । यो सरकारले दोषी पत्ता लगाउने कुनै छाँटकाँट देखिनदैन’ उनले प्रश्न गरे, ‘यस्ता सरकारसँग जनताले के आशा राख्नु ?’
सरकारले निर्मलालाई न्याय नदिलाएपनि आफ्नो पार्टीले न्याय दिलाएरै छोड्ने उद्घोष गरे । ‘निर्मलाले न्याय पाउनुपर्छ । दोषी जति लुकाएपनि लुक्दैन । एक दिन अवस्य पर्दाफास हुन्छ’ विद्रोहीले भने, ‘त्यसका लागि जति संघर्ष गर्नु पनि हामी र हाम्रो पार्टी तयार छ ।’
निर्मला पन्तको न्यायका लागि सरकारलाई दवावद दिन आइतबार नेपाल कम्युनिष्ट पार्टीले देशभर जनप्रदर्शन गरेको थियो ।
https://www.youtube.com/watch?v=_G-PPbxMLs0&fbclid=IwAR1YoqrbIvL5FJuMoCz-6hXcTYpiCWIasZLk9D-rWHiLZsneekL4gZ_wypQ
