आरपी सहयात्री
युएई : नेपाल पत्रकार महासंघ युएईका अध्यक्ष हुन् त्रिलोचन कोइराला । तर उनको परिचय थपिएको छ । त्यसोत १५ बर्षदेखि युएईमा रहेका उनी सफल नेपाली व्यवसायी पनि हुन् । यससँगै उनले म्युजिक भिडियो निर्देशनमा पनि पाइला राखेका छन् ।
युएईमा कम्प्युटरको सामानको बिक्रीबितरण गर्ने सगरमाथा टेक नामको व्यावसाय सुरु गरेका कोइरालाको लगानीमा सिटी लाइफ ट्राभल पनि खुलेको छ । त्यतिमात्र होइन, जीवनका उर्बर समयमा नेपाली नाट्य क्षेत्रमा काम गरेका कोइराला युएईमा म्युजिक भिडियो निर्देशनतिर लागेका छन् । उनको यो पछिल्लो नयाँ परिचय हो ।
युएईमा नेपाली गीतको म्युजिक भिडिया बन्ने क्रम तीव्र छ । प्रवासबाट पनि स्तरीय म्युजिक भिडियो बन्छ भन्ने मान्यता कोइरालाले प्रमाणित गर्दै लगेका छन् ।
हिमालय टेलिभिजनको न्यु इन्ट्री कार्यक्रम तथा सङ्स नेपालको युटुब च्यानल मार्फत् सार्वजनिक भएको आधुनिक गीत ‘हसाउँछौ तिम्रै मर्जी’ त्यसको पछिल्लो उदाहरण हो ।
युएईका रमणीय स्थानमा छायांकन गरी स्तरीय बनाउने भन्ने प्रतिस्पर्धा बढिरहेको बेला यस गीतलाई पनि युएईको बिभिन्न रमणीय स्थान, टुरिस्ट स्पट एवम् हलिउडका धेरैवटा चलचित्र छायांकन भैसकेको स्थल युएई र ओमन बोर्डर दुबईको हत्ता भन्ने ठाउँमा छायांकन गरिएको छ ।
उदीयमान गायिका बबिना भटराईको कर्णपि्रय स्वरले सजिएको ‘हसाउँछौ तिम्रो मर्जी, रुवाउँछौ तिमै मर्जी’ अबिनास थापाको शब्दलाई दिपक शर्माले संगीत भरेका छ्न । केही महिना अघि बजारमा आएको उक्त गीतको म्युजिक भिडियोमा नवमोडल राजेश बोहरा र सारिका सुनारलाई संचारकर्मी कोइरालाले अभिनय गराएका छन् ।
डेढ दर्जन नाटक लेखन एवम् निर्देशन गरिसकेका पत्रकार कोइरालाले नयाँ अनुभवको लागि म्युजिक भिडियोमा काम गरेको बताउँछन् ।
भिडियोको छायांकन तथा निर्देशन कोइरालाले नै गरेका छन् भने भिडियो सम्पादन भुवन थनेतको रहेको अनलाइनखबरले छापेको छ । भिडियो मोफसल मिडिया ग्रुपले बजारमा ल्याएको हो ।
