इलामः इलामको फाकफोकथुम गाउँपालिका-३ आमचोक निवासी ४५ वर्षीय रामकुमार थेगिम (होम्बे) हराएको एक दिनपछि गम्भीर अवस्थामा फेला परेका छन्। प्रहरीद्वारा उद्धार गरी उपचारका लागि बिर्तामोड नगर अस्पताल लाने क्रममा शनिबार बेलुका उनको निधन भएको छ।थेगिम जेठ १५ गते बेलुका करिब ८ बजे उपचारका लागि बिर्तामोड पुगेपछि सम्पर्कविहीन भएका थिए। उनीसँग मोबाइल फोनसमेत नभएकाले परिवारले खोजीका लागि इलाका प्रहरी कार्यालय अनारमनीमा निवेदन दर्ता गरेको थियो। साथै, सामाजिक सञ्जालमार्फत पनि उनको खोजीका लागि अनुरोध गरिएको थियो।
प्रहरीले शनिबार बेलुका बिर्तामोड क्षेत्रमा उनलाई फेला पारी उपचारका लागि नगर अस्पताल पुर्याएको थियो। तर स्वास्थ्य अवस्था गम्भीर रहेकाले उपचारकै क्रममा उनको मृत्यु भएको स्थानीय बिरु थेगिमले जानकारी दिए। उनका अनुसार हाल शव पोस्टमार्टमका लागि भद्रपुर अस्पताल लगिएको छ।
सिरिजंगा सांस्कृतिक क्लबका संरक्षक तथा समाजसेवीका रूपमा परिचित थेगिम गाउँका विभिन्न सामाजिक कार्यमा सक्रिय रहँदै आएका थिए। उनको असामयिक निधनले फाकफोकथुम-३ आमचोकवासी तथा सिरिजंगा सांस्कृतिक परिवारलाई स्तब्ध बनाएको छ। स्थानीयवासीले उनको निधनप्रति गहिरो दुःख व्यक्त गर्दै शोकसन्तप्त परिवारजनप्रति हार्दिक समवेदना प्रकट गरेका छन्।
