इलाम : इलाम जिल्लास्तरीय राष्ट्रपति रनिङ सिल्ड प्रतियोगिताको १६ औं संस्करण आउँदो वर्ष सूर्योदय नगरपालिकामा हुने भएको छ ।
विगत ३ वर्षदेखि सदरमुकामबाट विकेन्द्रीकरण गरी बाहिर आयोजना गर्न थालिएको राष्ट्रपति रनिङ सिल्ड प्रतियोगिता अर्को वर्ष अर्थात् २०८२ मा सूर्योदय नगरपालिकामा निश्चित भएको हो ।
जिल्ला खेलकुद विकास समिति इलामको आयोजनामा प्रत्येक वर्ष राष्ट्रपति रनिङ सिल्ड प्रतियोगिता हुने गर्दछ । यस वर्ष १५ औं राष्ट्रपति रनिङ सिल्ड प्रतियोगिता मङ्गलबार माई नगरपालिकामा सम्पन्न भएको छ। यस वर्षको प्रतियोगिता सम्पन्न भएसँगै आउँदो वर्ष सूर्योदय नगरपालिकामा प्रतियोगिता सञ्चालन हुने टुङ्गो लागेको हो ।
सूर्योदय नगरपालिकामा प्रतियोगिताको १६ औं संस्करण आयोजना गर्न टुङ्गो लागेसँगै सो पालिकालाई प्रतियोगिता सञ्चालनको झण्डा हस्तान्तरण गरिएको छ । कोशी प्रदेश आर्थिक मामिला तथा योजना मन्त्री रामबहादुर मगर र जिल्ला खेलकुद विकास समिति अध्यक्ष खगेन्द्र बाँस्तोलाले सूर्योदयका कार्यवाहक नगर प्रमुख दुर्गाकुमार बराललाई प्रतियोगिता सञ्चालनको झण्डा हस्तान्तरण गरेका हुन् ।
सूर्योदय नगरपालिकासँग समन्वय गरेर जिल्लास्तरीय राष्ट्रपति रनिङ सिल्ड प्रतियोगिता सञ्चालनका लागि झण्डा हस्तान्तरण गरिएको अध्यक्ष बाँस्तोलाले बताए । राष्ट्रपति रनिङ सिल्ड प्रतियोगिता सदरमुकाबाट विकेन्द्रित गरिन थालेपछि पहिलोपटक १३ औं संस्करण फाकफोकथुम गाउँपालिका सञ्चालन गरिएको थियो । त्यसपछि १४ औं संस्करण माङसेबुङ गाउँपालिकामा र १५ औं संस्करण माई नगरपालिकामा सञ्चालन गरिएको हो ।
सदरमुकाम बाहिर जिल्लास्तरीय राष्ट्रपति रनिङ सिल्ड प्रतियोगिता सञ्चालन हुन थालेपछि स्थानीय स्तरसम्म विभिन्न खेल विधाबारे जानकारी हुन थालेको र यसले सिङ्गो खेलकुदा विकासमा टेवा पुर्याएको अध्यक्ष बाँस्ताले बताए ।
इलाममा १० वटा स्थानीय तह छन् । सबै स्थानीय तहमा पालैपालो प्रतियोगिता सञ्चालन गर्दै लैजाने सहमति भएको जिल्ला खेलकुद विकास समिति कार्यालय प्रमुख नारायण भट्टराईले बताए ।
