घुर्बिसे पञ्चमीः घुर्बिसे पञ्चमीमा आयोजित सेहोनाम्लाङ महोत्सवको सांगीतिक कार्यक्रममा गायक तथा अभिनेता प्रशान्त तामाङको पर्खाइमा थिए दर्शक । नयाँ वर्षको अवसरमा इलाम र पाँचथरको सिमानामा आएका उनी दिउँसो पर्यटकीय स्थल सुकेपोखरीमा घुम्न गए । साँझपख महोत्सवमा आइपुगे । त्यसबेला उनले गाएका चर्चित गीतहरु सांगीतिक माहोलमा घन्किन्दै थिए । आयोजक,अतिथि दर्शकले उनलाई भव्य स्वागत गरे । प्रायः सुविधा सम्पन्न र परिचित ठाउँमा मात्रै उनलाई बोलाइने सेलीब्रेटी तामाङ ग्रामीण ठाउँमा आइपुग्दा सोचे भन्दा फरक माहोल देखे । उनले सबैलाई सम्बोधन गर्दै नयाँ वर्षको शुभकामना व्यक्त गरे ।
अनि विदेशीएका आफन्तहरुको सम्झनामा डेडीकेट भन्दै शुरु गरे “विछोडको करौतीले काट्नु मनै काट्यो, जाँदा जाँदै मुलबाटोको दुईटा बाटो फाट्यो…. यहाँबाट आफ्नो प्रस्तुती थाले । दर्शकको हुटिङ् बढ्न शुरु गर्यो । एकपछि अर्को मार्मिक गीतहरु गुञ्जिन थाले । जब उनले “घामको हो… माया,जुनको माया.. अझै धेरै उनको माया…” गीत गाउँदा गाउँदै स्टेजमा आँफै भावुक बने अनि आँसुसम्म खसाले । केही बेर रोकिए । उनले भने, ‘आफ्नो सानो छोरी आरिया बुबा र आमाको सदैव साथ खोज्छिन् । त्यसैले लामो समयदेखि कुनै पनि प्रोग्राममा नगएको र यसबेला छोरीदेखि टाढा रहेको समयमा यस गीतले छोरीको याद आयो मन छोयो।’ यसैकारण उनी भावुक बने । सानै उमेरमा बुबा र केही वर्ष अघि मात्रै आमा गुमाएका ईण्डियन आइडल तामाङले आफ्नी सानी छोरीको बढी सम्झना भएकाले भावुक बनेको दर्शक सामु सुनाए । तामाङलाई अभिभावकको महत्व र छोराछोरीलाई माया प्रेमको अभावमा कस्तो पीडा हुन्छ यसकुराले मन छोएको बताउँदै ग्रामीण क्षत्रेका दर्शक र शुभचिन्तकले देखाएको माया प्रेम थाम्न नसकेर आँसुसम्म खसालेको भन्न भ्याए ।
इलाम र पाँचथरको सिमाना घुर्बिसे पञ्चमीमा चैत्र २६ गतेदेखि एक हप्तासम्म संचालित महोत्सवमा नयाँ वर्ष २०८१ को पहिलो उनी पहिलो पटक पाँचथरमा आएका थिए । दर्शकको ओइरो लागेको यस साँगीतिक साँझमा केही समय शुभचिन्तकहरु पनि यस बेला भावुक देखिए ।
महोत्सवमा फाल्गुनन्द गाउँपालिका घरभइ स्थानीय क्षेत्र बाहिर रहेका कलाकार निरन्ता नेम्वाङ, गायक तथा संगीतकार असोक मुकारूङ, एकान्त आङ्देम्बे,जेपी नेम्वाङ,आइन्द्र नेम्वाङलगायतले अघिल्ला दिनमा साँगीतिक माहोल तताएर दर्शकलाई मनोरन्जन दिलाएका थिए । यसै अवसरमा दर्जनौ स्थानीय कलाकारले कला प्रदर्शन गर्ने मौका पाए ।
यस ठाउँमा पहिलो पटक हाम्रो गन्तव्य,संस्कृति प्रवर्द्धन भन्ने उदेश्यले आयोजना गरिएको सेहोनाम्लाङ औधौगिक तथा साँस्कृतिक पर्यटन महोत्सवलाई सम्पन्न गर्न पाँचथरको फाल्गुनन्द,मिक्लाजुङ र कुम्मायक गाउँपालिका र वडापालिकाहरुको सहयोग रहेको छ । साथै इलामको फाकफोकथुम गाउँपालिका र विदेशबाट तथा स्थानीयबाट पनि सहयोग गरिएको आयोजकले जनाएको छ । महोत्सव मार्फत स्थानीय धार्मिक तथा पर्यटकिय स्थलको प्रचारप्रसार,खेलकुद,भाग्यशाली उपहार योजना,अर्गानिक रैथानेखाना,स्थानीय उत्पादित कला,कृषिजन्य वस्तुलगायतको व्यापार पनि गरिएको छ ।
