१ सय ३८ वर्ष अर्थात् ६ पुस्तासम्म एउटा परिवारमा कुनै छोरी जन्मिएन भन्ने विश्वास गर्नुहुन्छ ? तर, अमेरिकामा एउटा यस्तै परिवार छ । जहाँ पछिल्ला ६ पुस्ताले दिदीबहिनी र छोरी देखेनन् । अब भने यो लामो प्रतीक्षा सकिएको छ । यो परिवारमा १३८ वर्षपछि छोरी जन्मिएकी छिन् । बालिकाकी आमाले सामाजिक सञ्जालमा आफ्नो कथा साझा गरिन्, जुन भाइरल भयो । मानिसहरूले यी नवजात बालिकालाई स्वागत गरिरहेका छन् । यसका साथै मानिसहरू यो परिवारको कथा पनि खोजिरहेका छन् । परिवारको अन्तिम छोरी सन् १८८५ मा जन्मिएकी थिइन् अमेरिकाको मिशिगनमा बस्ने एन्ड्रयूको परिवारमा सन् १८८५ अन्तिम पटक छोरीको जन्म भएको थियो, जुन एन्ड्रयूभन्दा ६ पुस्ता अघिको कुरा हो । त्यसपछि यो परिवारमा छोरीहरूको खडेरी परेको थियो । एन्ड्रयूका पुर्खाहरुले सुरुका केही वर्षसम्म यो कुरालाई सामान्य तरिकाले हेर्यो । तर, पुस्तौपुस्तासम्म छोरी नजन्मिएपछि यो परिवार अलि चिन्तित भयो । एन्ड्र्यूको पुर्खाहरुले यसलाई आफ्नो नियतिको रूपमा स्वीकार गरे । एन्ड्रयूलाई पनि छोरीको आशा थिएन परिवारको लामो इतिहास सम्झेर एन्ड्रयू र उनकी श्रीमती कार्लेनले पनि छोरी पाउने आशा त्यागेका थिए । यो दम्पत्तिको पहिलो सन्तान पनि छोरो नै जन्मिएको थियो । यस पटक पनि दुवैले छोरा नै जन्मिएल भन्ने ठानेका थिए । तर, छोरी जन्मिएपछि उनीहरूको खुसीको सीमा रहेन । छोरी जन्मिएकोमा एन्ड्रयू र उनकी श्रीमतीले पूरा परिवारका लागि शानदार पार्टी दिए । डेटिङ गर्दा परिवारको इतिहास सुनाएका थिए अमेरिकी मिडियामा एन्ड्रयू र उनको परिवारको कथाबारे धेरै कुरा लेखिएको छ । यस अनुसार एन्ड्रयूले आफ्नी श्रीमती कार्लेनलाई डेट गरिरहँदा नै आफ्नो पारिवारिक इतिहासबारे जानकारी दिएको र छोरीको आशा नगर्न सल्लाह दिएका थिए । चिकित्सा विज्ञानअनुसार छोरा र छोरीको जन्म अनुपात ५०–५० डाक्टरका अनुसार जब गर्भमा लिङ्ग निर्धारण हुन्छ तब छोरा वा छोरी हुने सम्भावना ५०–५० प्रतिशत हुन्छ । केही मामिलामा अपवादस्वरुप तेस्रो लिङ्गी जन्मिन्छन् । यस्तोमा कुनै परिवारमा ६ पुस्ता अर्थात् १३८ वर्षसम्म कुनै छोरी नजन्मिनु संयोग नै मान्नुपर्ने डाक्टरहरु बताउँछन् ।-रातोपाटीबाट
