इलाम : इलामको सन्दकपुर गाउँपालिकाले सेवाग्राहीका गुनासो, सुझाव तथा समस्या प्रत्यक्ष रूपमा सुन्न शुक्रबार सार्वजनिक सुनुवाइ कार्यक्रम आयोजना गर्ने भएको छ ।
गाउँपालिकाबाट प्रवाह हुने सेवा, विकास निर्माण, प्रशासनिक कार्यप्रणाली तथा जनप्रतिनिधि र कर्मचारीको भूमिकाबारे सेवाग्राहीको प्रत्यक्ष धारणा संकलन गर्ने उद्देश्यले शुक्रबार सार्वजनिक सुनुवाइ कार्यक्रम आयोजना गर्न लागेको हो ।
गाउँपालिकाको कार्यालय प्राङ्गणमा माबुमोड देउरालीमा सार्वजनिक सुनुवाइ कार्यक्रम आयोजना गरिने प्रमुख प्रशासकीय अधिकृत दिलकुमार लिम्बूले जानकारी दिए ।
कार्यक्रममा सेवाग्राहीको गुनासो, सुझाव तथा समस्या प्रत्यक्ष रूपमा सुन्न गाउँपालिका अध्यक्ष तुलाराम गुरुङ, उपाध्यक्ष हरिबहादुर लुङ्गेली. प्रमुख प्रशासकीय अधिकृत लिम्बूसहित वडाध्यक्षहरू, विषयगत शाखा प्रमुखहरू र सरोकारवालाका रुपमा सेवाग्राहीहरूको सहभागिता रहने जनाइएको छ ।
कार्यक्रममा पहिलो चरणमा चालु आर्थिक वर्ष २०८२/०८३ मा गाउँपालिकाबाट भएका विकास निर्माण, सुशासन प्रवर्द्धन र सेवा प्रवाह र अघिल्लो सार्वजनिक सुनुवाइमा उठेका प्रश्न, गुनासो र सुझावको कार्यान्वयन अवस्थाबारे प्रतिवेदन गाउँपालिकाको तर्फबाट प्रस्तुत हुनेछ । त्यस्तै तेस्रो पक्ष इलाम मल्टिपर्पोज कम्पनी प्रालिको तर्फबाट तयार गरिएको नागरिक प्रतिवेदन र बहिर्गमन प्रतिवेदन प्रस्तुत हुनेछ ।
दोस्रो चरणमा सेवाप्रदायक निकाय सन्दकपुर गाउँपालिका र सेवाग्राहीबीच सवालजवाफ हुनेछ । सवालजवाफमा सेवाग्राहीले विकास निर्माण, सुशासन प्रवर्द्धन र सार्वजनिक सेवा प्रवाहका सम्बन्धमा आफ्ना गुनासा, जिज्ञासा र सुझाव प्रत्यक्ष रूपमा राख्नेछन् । कार्यक्रममा उठेका गुनासो र सुझावको तत्काल समाधानका लागि आवश्यक पहल गरिने गाउँपालिकाले प्रतिवद्धता जनाउनेछ ।
गाउँपालिकाले स्थानीय बासिन्दा, नागरिक समाज, राजनीतिक दल, सेवाग्राही, महिला, दलित, ज्येष्ठ नागरिक, अपाङ्गता भएका व्यक्ति, युवा, पत्रकार तथा सरोकारवाला सबैलाई सार्वजनिक सुनुवाइ कार्यक्रममा उपस्थित भई आफ्ना धारणा राख्न आग्रह गरेको छ ।
सार्वजनिक सुनुवाइले गाउँपालिकाको सेवा प्रवाहलाई थप पारदर्शी, जवाफदेही र नागरिकमैत्री बनाउन सहयोग पुग्ने विश्वास गाउँपालिकाले लिएको छ । सार्वजनिक सुनुवाइले स्थानीय सरकार र नागरिकबीचको दूरी घटाउने, सेवा प्रवाहप्रति विश्वास बढाउने र जनप्रतिनिधि तथा कर्मचारीलाई थप जिम्मेवार बनाउने अपेक्षा गरिएको छ ।
