माङसेबुङ : प्रधानमन्त्री रोजगार कार्यक्रम अन्तरगत इलामको माङसेबुङ गाउँपालिकामा विभिन्न ९ वटा आयोजनाको मर्मत गरिएको छ ।
गत १३ असारदेखि संचालित कार्यक्रम अन्तरगत वडाले प्राथमिकता र पहिचान गरी छनौट गरेका ६ वटै वडाका ९ वटा सडक आयोजनाको मर्मत गरिएको हो । कार्यक्रम अन्तरगत सडकको खाल्डाखुल्डी पुर्ने, नाली व्यवस्थापन गर्ने, सोलिङ गर्नेलगायतको काम गरिएको जनाइएको छ ।
प्रधानमन्त्री रोजगार कार्यक्रम अन्तरगत ‘काममा लागि पारिश्रमिक’ मा प्राथमिकता क्रममा सहेका प्रत्येक वडामा १५ जनाका दरले ९० जना बेरोजगारले रोजगार पाएको कार्यक्रम अधिकृत दिपेशकुमार दासले जानकारी दिए ।
कामका लागि पारिश्रमिक कार्यक्रममा ८ सय १० दिन बराबरको रोजगार सिर्जना गरी प्राथमिकतामा परेका बेरोजगारलाई रोगारको काममा लगाइएको अधिकृत दासले जानकारी दिए । उनीहरुले १ दिन बराबर ५ सय १७ रुपैयाँ पाए । कार्यक्रम अन्तरगत माङसेबुङ गाउँपालिकामा ६ लाख रुपैयाँ प्राप्त भएको थियो ।
गाउँपालिकाले माग गरेको सूचना अनुसार आवेदन दिएकामध्ये तोकिएको मापदण्डमा प्रत्येक वडाबाट बेरोजगार प्राथमिकीकरण गरी रोजगारको काममा लगाइएको माङसेबुङ गाउँपालिकाका अध्यक्ष डिकेन्द्र इदिङ्गोले बताए ।
श्रम, रोजगार तथा सामाजिक सुरक्षा मन्त्रालयले बेरोजगार नागरिकलाई रोजगारी दिन १ फागुन २०७५ देखि प्रधानमन्त्री रोजगार कार्यक्रम ल्याएको हो।
‘सबैका लागि रोजगार: संवैधानिक अधिकार’ नारा भएको यो कार्यक्रम श्रमिकलक्षित छ।