इलाम : इलामको माङसेबुङ गाउँपालिकाभित्रका ऐतिहासिक, धार्मिक र पर्यटकीय स्थलहरूको अनुसन्धानका लागि आयोजना गरिएको पदयात्रा मङ्गलबार सकिएको छ ।
गाउँपालिकाभित्रका ऐतिहासिक, धार्मिक तथा पर्यटकीय क्षेत्रको अनुसन्धानमूलक लेख प्रकाशन गर्ने उद्देश्यका साथ आयोजित कार्यक्रम धार्मिक क्षेत्र गजुरमुखी धाममा पुगेर सकिएको हो ।
आयोजक बुलन्द मल्टिटेक्निकल मिडिया प्रालिका अध्यक्ष राम योङहाङको अध्यक्षता र माङसेबुङ गाउँपालिका अध्यक्ष हेमन्त राईको प्रमुख आतिथ्यतामा समापन कार्यक्रम भएको हो । कार्यक्रममा प्रमुख अतिथि राईले पदयात्रा कार्यक्रमले माङसेबुङको पर्यटन प्रवर्द्धनमा महत्वपूर्ण योगदान पुर्याउने विश्वास वयक्त गरे । गाउँपालिकाको समग्र क्षेत्रको विकासका लागि पत्रकारिता क्षेत्रको भूमिका महत्वपूर्ण रहने उल्लेख गर्दै राईले पर्यटन पदयात्रा मार्फत समेत माङसेबुङको पर्यटन प्रवर्द्धनमा योगदान पुगेको उल्लेख गरे ।
उनले गाउँपालिकाको धार्मिक, पर्यटकीय क्षेत्रहरूको पहिचान गर्दै पर्यटकहरूलाई भित्र्याउने लक्ष्यका साथ गाउँपालिका अगाडि बढेको उनले बताए । उनले कोशी प्रदेश सरकारले यसैवर्षबाट पर्यटन वर्ष मनाइरहेको सन्दर्भमा गाउँपालिकाले यहाँका पर्यटकीय क्षेत्रहरूको विकासका लागि काम गरिरहेको बताए ।
११ जना पत्रकारहरुको सहभागिता रहेको पदयात्राका क्रममा माङसेबुङ गाउँपालिकाभित्र रहेका १८ वटा पर्यटकीय, धार्मिक तथा ऐतिहासिक क्षेत्रको भ्रमण एवम् अवलोकन गरिएको थियो । माङसेबुङ गाउँपालिका-४ स्थित अन्धराजाअन्धरानी क्षेत्रबाट सुरु भएको सात दिने पदयात्रा गजुरमुखी धाममा पुगेर समापन भएको थियो ।
कार्यक्रम अन्तरर्गत अन्धराजा अन्धरानी क्षेत्र (वडा नं. ४), लारुम्बा (माङसेबुङ) (वडा नं. ५), उत्तरे (वडा नं. ३), फुलुङ्गी (वडा नं. ३), गीद्धेभीर (वडा नं. ३) माङमालुङ र विजुवानी (वडा नं. २/६), तीनथुम्की डाँडा (वडा नं. ६), विराटज्योति माङहिम (वडा नं. ६), पारुहाङ साकेला पार्क (वडा नं. ६), चमेरे गुफा (वडा नं. २), चुक्चीनाम्बा (वडा नं. २), अगौटेबारी (वडा नं. २), चारसुरे डाँडा (वडा नं. २), शहिद रत्नकुमार वान्तवा सहादतस्थल (वडा नं. २), नावालुङ (वडा नं. १), सर्वशान्ति बुद्ध विहार (वडा नं. १), घोर्लेभीर (वडा नं. १) र गजुरमुखी धाम (वडा नं. १) को भ्रमण एवम् अवलोकन गरिएको थियो ।
पदयात्राका क्रममा भ्रमण र अवलोकन गरिएको १८ स्थान र अर्को एकसहित १९ वटा क्षेत्रको बारेमा खोजमूलक सामग्री तयार गर्न पदयात्रामा सहभागी पत्रकारहरुलाई लेखनवृत्ति प्रदान गरिएको कार्यक्रम संयोजक कमन देवानले जानकारी दिए ।
कार्यक्रम समापनका अवसरमा बुलन्द मल्टिटेक्निकल मिडिया प्रालिका तर्फबाट माङसेबुङ गाउँपालिका कार्यालय र कार्यक्रम संयोजक कमन देवानलाई धन्यवादनपत्र प्रदान गरेको थियो । त्यस्तै सहभागीहरुलाई प्रमाणपत्र प्रदान गरिएको थियो । कार्यक्रमका लागि माङसेबुङ गाउँपालिकाले आर्थिक सहयोग गरेको थियो ।
