इलामको सेरोफेरो

विद्यालयका प्रिन्सिपलले हामीलाई इलाम भ्रमणमा लैजाने भनेकै दिनदेखि मेरो मन त्यसैत्यसै रमाइरहेको थियो । मंसिर २९ गते जाने दिन तय भएको थियो । म एकदमै उमंगका साथ त्यो दिन पर्खिरहेकी थिएँ । मेरा सहपाठीहरूका पनि भुइँमा खुट्टा थिएनन् । मंसिर २८ गते राति निद्रा परेको होइन । तीन चारपल्ट उठेर समय हेरेँ । पछिल्लो पटक उठेर समय हेर्दा साढे ३ बजेको रहेछ्र । जुरुक्क उठेँ । नुहाएँ र स्कुलको पोसाक लगाएँ । म स्कुल पुग्दा मेरा केही साथीहरू आइसकेका थिए । सबैजना आइसकेपछि प्रिन्सिपल सरले गाडीमा हामी सबैलाई मिलाएर बसाउनुभयो । बिहानको ५ बजे हाम्रो इलाम यात्रा सुरु भयो । बिहानी पखको झुल्कँदो घामसँगै चिसो बतास चलिरहेको थियो । बसको झ्यालबाट हरियाली पहाड हेर्दै गीतका मीठमीठा धुन सुन्दै हामी अघि बढ्यौं । सुनकोसी नदीको किनारबाट नदीको मनोरम दृश्य देखियो । खुर्कोटको डाँडा हुँदै ठीक १२:३० सिन्धुलीगढी पुग्यौं, हामी सिन्धुली बजार पुग्यौं । त्यतिन्जेलसम्म हामी सबै भोकाइसकेका थियौं । शिक्षक शिक्षिकाहरूले त्यही हामी सबैलाई खाना खाने प्रबन्ध मिलाउनुभयो ।