ताप्लेजुङ : ताप्लेजुङका ५९ वडा सडक सञ्जालसँग जोडिएका छन् । जिल्लाका ९ वटा स्थानीय तहका ६१ वडामध्ये अब दुई वटा वडामा मात्रै सडक पुग्न बाँकी छ ।
स्थानीय तहमा जननिर्वाचित प्रतिनिधि आएपछि सडक निर्माणलाई प्राथमिकतामा राखिएसँगै अधिकांश वडामा सडक पुगेको हो ।
सिरिजंघा गाउँपालिका–६ मामांखे र मिक्वाखोला गाउँपालिका–५ पापुङ बाहेकका सबै क्षेत्र सडक सञ्जाल पुगेको छ ।
मामांखेमा यसै आर्थिक वर्षभित्रै सडक पुर्याउने गरी काम भइरहेको छ भने चीनसँग सिमा जोडिएको पापुङमा भने भौगोलिक विकटताका कारण केही समय लाग्ने देखिएको छ ।
गाउँगाउँमा सडक पुगे पनि सबै ठाउँमा सवारीसाधन चल्दैनन् । कतिपय क्षेत्रमा पुल नबनेको र केही ठाउँमा ट्रयाक मात्रै खोलिएकाले सवारी साधन चल्न नसकेका हुन् ।
साविकका गाविसहरु ओलाङचुङगोला, खेवाङ, सुरुम्खिम, मेहेले लगायतमा स्थानीयले समेत लगानी गरेर सडक बनाइएपछि पुल अभावलगायतका कारण सवारी साधन सञ्चालनमा आउन सकेका छैनन् ।
