इलाम : इलाममा आउँदो बैशाख ६ गते चर्चित गायिका रचना रिमालको बृहत सांगीतिक साँझ आयोजना हुने भएको छ। नेपाल विद्यार्थी सघले आफ्नो ५५ औं स्थापना दिवसको अवसर पारेर जिल्ला शाखा इलामले आयोजना गर्न लागेको हो ।
यो कार्यक्रमले इलामको संगीत पारखी युवाहरूमा उत्साह छाएको छ। नेविसघ इलाम शाखाका उपाध्यक्ष प्रविण कट्टेलले इलामको संगीत क्षेत्रमा नयाँ आयाम थप्ने उद्देश्यले यो कार्यक्रम आयोजना गरिएको बताए।
“इलामका युवाहरूलाई मनोरञ्जन प्रदान गर्नुका साथै यहाँको कला र संस्कृतिलाई प्रवर्द्धन गर्ने हाम्रो उद्देश्य हो,” उनले भने, “रचना रिमालको लोकप्रिय गीतहरूले दर्शकलाई भरपूर मनोरञ्जन दिनेछ।”
कार्यक्रममा रिमालले ‘फोटो फिरिम्मा’, ‘उनको प्रीति’, ‘पानी छम्किने’ लगायतका चर्चित गीतहरू प्रस्तुत गर्नेछिन्। युवापुस्तामाझ लोकप्रिय रिमालको प्रस्तुतिले इलामको माहोल संगीतमय बनाउने अपेक्षा आयोजकले गरेका छन्।
कार्यक्रम इलामको गौतम बुद्ध सभागृहमा हुने आयोजकले जनाएको छ । कार्यक्रममा इलामका स्थानीय कलाकारहरूले पनि आफ्नो प्रस्तुति दिने बताइएको छ।
टिकटको मूल्य र बिक्री वितरणको बारेमा पनि छिट्टै जानकारी गराइने आयोजकले बताएका छन्। कार्यक्रमलाई व्यवस्थित बनाउन र दर्शकहरूको सुरक्षालाई ध्यानमा राख्दै आवश्यक तयारी भइरहेको छ।
यो कार्यक्रमले इलामको पर्यटन प्रवर्द्धनमा पनि सहयोग पुग्ने अपेक्षा गरिएको छ। इलामको सुन्दरता र यहाँको सांस्कृतिक महत्त्वलाई देशव्यापी रूपमा चिनाउन यस्ता कार्यक्रमहरू महत्त्वपूर्ण हुने स्थानीय बासिन्दाहरू बताउँछन्।
कार्यक्रमको सफलताको लागि स्थानीय प्रशासन, सुरक्षा निकाय र सरोकारवालाहरूसँग समन्वय भइरहेको नेविसघले जनाएको छ। कार्यक्रममा दर्शकहरूको उल्लेख्य सहभागिता रहने अपेक्षा आयोजकले गरेका छन्।
