नयाँ बुलन्द
पाँचथर : नेपाल आदिवासी जनजाति पत्रकार महासंघ (फोनिज) का केन्द्रीय सदस्य एवम् पाँचथरका क्रियाशील पत्रकार विजयवोध लावती सम्मानित भएका छन् ।
पाँचथरमा आयोजित कार्यक्रममा प्रेस सेन्टर नेपाल जिल्ला शाखा पाँचथरले पत्रकार लावतीलाई शुक्रबार सम्मान गरेको हो । गत २४ गते काठमाडौंमा सम्पन्न फोनिजको छैठौं संघीय महाधिवेशनबाट केन्द्रीय सदस्यमा निर्वाचित लावतीलाई आगामी दिनमा नेपाली पत्रकारिताको जगतलाई प्रतिष्ठित बनाउनका लागि भन्दै शुभकामना सहित सेन्टरले सम्मान गरेको हो ।
फिदिम नगरपालिका २ निवासी लावती विगत १८ वर्षदेखि नेपाली पत्रकारिता क्षेत्रमा कलम चलाउँदै आएका छन् । नेपाल पत्रकार महासंघ जिल्ला शाखा पाँचथरका उपाध्यक्ष रहेका लावती नेपाल टेलिभिजनका पाँचथर प्रतिनिधिका रुपमा कार्यरत छन् ।
लावतीले यसअघि नेपाल पत्रकार महासंघ पाँचथरका सचिव, फोनिज पाँचथरका संस्थापक सदस्य, इमेच टेलिभिजनका पाँचथर प्रतिनिधि, नेपाल च्यानल पाँचथर प्रतिनिधि, सुम्हात्लुङ एफएम स्टेशन म्यानेजर, पापोहाङ साप्ताहिक सम्पादक/प्रकाशक, पापोहाङ मासिक सम्पादक/प्रकाशक, मर्निङ टाइम्स पाँचथर प्रतिनिधि, मोफसल साप्ताहिक पाँचथर प्रतिनिधि, पूर्वसन्देश दैनिक पाँचथर प्रतिनिधि भइ काम गरिसकेका छन् ।
साथै लिम्बू पत्रकार संघ पाँचथरका संस्थापक सदस्य, महासचिव हुँदै प्रथम उपाध्यक्ष सम्हालिरहेका छन् ।
