पाँचथर: समयमै अस्पताल लैजाने एम्बुलेन्स नपाउँदा पाँचथर कुम्मायक-२ की सुत्केरी महिलाको मृत्यु भएको छ । प्रसूतिपश्चात अत्यधिक रक्तस्रावका कारण जिल्लाको कुम्मायक गाउँपालिका-२ मङजाबुङकी १९ वर्षीया मनिषा आचार्य (गड्तौला) को बुधबार साँझ ज्यान गएको हो ।
पुस २० गते १० बजे स्वास्थ्य चौकी मङजाबुङमा प्रसूतिका लागि ल्याइएकी उनले ११:५५ बजे सामान्य अवस्थामा बच्चा जन्माएकी थिइन् ।
मृतक किशोरीका श्रीमान् वैदेशिक रोजगारीका लागि गएका छन् । स्वास्थ्य चौकी माङ्जाबुङमा प्रसुति भइ सामान्य भएपछी स्वास्थ्य चौकी माङ्जाबुङबाट घर लैजान आफन्तहरु जम्मा भएका थिए तर एक्कासी बेहोस भएपछी आफन्तले जिल्ला अस्पताल लैजान गाडी खोजे पनि समयमै गाडी नभेटिएको र पर्याप्त समय नहुँदा अस्पताल पुर्याउन ढिलो भएको उनका आफन्तले बताएका छन् ।
पाँचथर अस्पतालका प्रमुख डा. बुद्धिबहादुर थापाले प्रसूतिपछि हुने अत्यधिक रक्तश्रावकै कारण उनको मृत्यु भएको बताए ।
जिल्ला अस्पताल र प्राथमिक स्वास्थ्य केन्द्रबाहेक पाँचथरका अन्य स्वास्थ्य संस्थामा प्रसूति सेवा उपलब्ध छैन ।-कान्तिपुरबाट
