काठमाडौँ। नेपाली कांग्रेसले आफ्ना भ्रातृ संस्थाहरूको लामो समयदेखि हुन नसकेको अधिवेशन सम्पन्न गर्नका लागि एउटा निर्देशिका पारित गरेको छ।
सोमबार पार्टीको केन्द्रीय कार्यालय सानेपामा बसेको पदाधिकारी र निर्देशन समितिको संयुक्त बैठकले यो निर्देशिका पारित गरेको हो। पार्टीका प्रचार विभाग प्रमुख मिन विश्वकर्माका अनुसार, यो निर्देशिकाले अधिवेशन गराउन निर्देशन समितिलाई आवश्यक काम, कर्तव्य र अधिकार स्पष्ट पारेको छ। निर्देशिकालाई अन्तिम रूप दिनुअघि भ्रातृ संस्थाहरूका अध्यक्ष र समितिहरूसँग छलफल गरेर उनीहरूको सुझाव पनि लिइएको थियो।
बैठकमा पार्टी सभापति शेरबहादुर देउवा, उपसभापति पूर्णबहादुर खड्का र धनराज गुरुङ, महामन्त्री गगन थापा र विश्वप्रकाश शर्मा लगायतका शीर्ष नेताहरू उपस्थित थिए।
