पोखरा : चितवनको सहारा सहकारी ठगी प्रकरणमा चितवन जिल्ला अदालतले मागेको ५४ लाख रुपैया धरौटी बुझाएर राष्ट्रिय स्वतन्त्र पार्टी (रास्वपा) सभापति रवि लामिछाने रिहा भएका छन् ।
उनी धरौटी रकमकाे बैंक ग्यारेन्टी बुझाएर रिहा भएका हुन् । लामिछानेविरुद्ध दायर भएको मुद्दामा बुधबारदेखि बयान र थुनछेक बहस भएको थियो ।
जिल्ला न्यायाधीश दयाराम ढकालको इजलासमा बिहीबार थुनछेक बहस सकिएसँगै अदालतले धरौटीमा रिहा गर्न आदेश दिएको थियो ।
उक्त मुद्दामा सरकारी वकिलको तर्फबाट जिल्ला न्यायाधिवक्ता रवि न्यौपाने, शम्भुकुमार बस्नेत, दशरथ पंगेनी, भोलानाथ निरौला सहायक जिल्ला न्यायाधिवक्ताहरु बुद्धबहादुर थापा र अमृत सुवेदीले बहस गरेका थिए ।
जाहेरवालाका तर्फबाट वरिष्ठ अधिवक्ता डा सुरेन्द्र भण्डारी, दिनेश त्रिपाठी र राजकुमार श्रेष्ठ, अधिवक्ता गोपीलाल देवकोटा, रमेश काफ्ले, रामचन्द्र आरसी गौतम र सुनिता अधिकारीले बहस गरेका थिए ।
यस्तै प्रतिवादी लामिछानेका तर्फबाट वरिष्ठ अधिवक्ता शुशिलकुमार पन्त, जगन्नाथ पौडेल, धर्मराज आचार्य र सुरेन्द्रबहादुर थापा तथा अधिवक्ता रामाचन्द्र देवकोटा र डा नारायणदत्त कँडेलले बहस गरेका थिए ।
सरकारी वकिल कार्यालय चितवनले लामिछानेसहित १५ जना व्यक्ति र छ वटा संस्थाविरुद्ध सहकारीको रकम हिनामिना गरेर ठगी गरेको अभियोगसहित मुद्दा दर्ता गरेको थियो ।
लामिछाने, रामबहादुर खनाल, रबिना रिमाल, विशाल तामाङ,नवीन अछामी, कविता तामाङ, दीपक लामा, असरफ अलि सिद्दिकी, भगवती बम्जन, लक्ष्मीप्रसाद पौडेल, विज्ञान राई, नेत्रपाणि बास्तोला, शिवबहादुर गुरुङ र प्रगती श्रेष्ठविरुद्ध मुद्दा दर्ता भएको हो ।
लामिछानेलाई सहकारी ठगीमा मात्रै मुद्दा दर्ता गरिएको छ भने अन्य १२ जनालाई संगठित अपराध कसुरमा पनि मुद्दा दर्ता गरिएको सरकारी वकिल कार्यालयले जनाएको छ ।
प्रहरीको अनुसन्धान प्रतिवेदनमा यो सहकारीको ३८ करोड नौ लाख ७९ हजार रूपैयाँ हिनामिना भएको उल्लेख छ । सहकारीबाट विभिन्न कम्पनीमा गएको रकमसमेत गर्दा ५६ करोड २२ लाख ५० हजार रकम बिगो कायम हुनुपर्ने राय प्रहरीको छ । यसअघि गत ८ असोजमा पनि १७ जनाविरुद्ध चितवन जिल्ला अदालतमा मुद्दा दायर भइसकेको थियो ।
सरकारी वकिल कार्यालयले जीबी राईसहित कुमार रम्तेल, सागर केसी, बीरबहादुर रानाभाट, हेमन्त अधिकारी, छत्रमणी भट्टराई, भपेन्द्र राई, अनन्त बाबु राई, आशिष आनन्द, देवेन्द्र बाबु राई, दिनेश रोका, दीपा न्यौपाने, शिवप्रसाद आचार्य, मनोज गुरुङ, तीर्थराज लामिछाने, शरण विश्वकर्मा, थमन भन्ने दानबहादुर बुढामगरलाई प्रतिवादी बनाएर मुद्दा दायर गरेको थियो ।
लामिछाने यसअघि पोखराको सूर्यदर्शन सहकारी ठगी प्रकरणमा ६५ लाख, काठमाठौँको स्वर्णलक्ष्मी सहकारी प्रहरणमा ६० लाख र बुटवलको सहकारी प्रहरणमा एक करोड रुपैयाँ धरौटी बुझाएर रिहा भएका थिए ।
जिल्ला अदालतको फैसला बदर गरी लामिछाने लगायतलाई थुनामै राखेर मद्दाको किनारा लगाउनुपर्ने माग गर्दै जिल्ला सरकारी वकिलको कार्यालय कास्की र काठमाडौँले उच्च अदालतमा निवेदन दिएको छ भने उच्चले कारण देखाउ आदेश दिएको छ । लामिछानेलगायत विरुद्ध पर्सा जिल्लामा पनि मुद्दा दर्ताको प्रक्रिया अघि बढाइएको छ ।
