काठमाडौं : काठमाडौंबाट जनकपुर जाँदै माइक्रोबस सिन्धुलीमा दुर्घटना हुँदा एक जनाको मृत्यु भएको छ ।
बिहीबार साँझ सुनकोशी गाउँपालिका ६ कानढुंग्रे भन्ने स्थानमा बा ३ ख ८४४५ नम्बरको हायस माइक्रोबस दुर्घटना हुँदा धनुषाको जनकपुर उपमहानगरपालिका–१० का ५० वर्षीय निर्मल गुप्ताको मृत्यु भएको हो ।
गुप्ताको धुलिखेल अस्पतालमा उपचारको क्रममा मृत्यु भएको जिल्ला प्रहरी कार्यालय सिन्धुलीका प्रवक्ता एवम् डिएसपी अनिल कुमार खड्काले जानकारी दिए ।
दुर्घटनामा अन्य १२ जना घाइते भएका छन् । घाइतेमध्ये ६ जनाको उपचार धुलिखेल अस्पतालमा भइरहेको छ । अरु ६ जना घाइतेलाई उपचारका लागि काठमाडौं ल्याइएको छ ।
विहीबार साँझ साढे पाँच बजे पछाडिको टायर पन्चर हुँदा सडक छेउको डिभाइडरमा ठोक्किएर माइक्रो बस दुर्घटना भएको सिन्धुली प्रहरीले जनाएको छ ।
