इलाम : मेची राजमार्गको इलाममा पर्ने राजदुवाली–गोलाखर्क खण्ड अवरुद्ध भएको छ । निरन्तरको वर्षाका कारण गएराति साढे ३ बजेतिर माथिबाट पहिरो झरेपछि यो खण्ड अवरुद्ध भएको हो ।
सधैं जोखिमयुक्त रहेको यो खण्डमा माथिबाट ग्याबिनसहितको ढुंगाको पर्खाल खसेको छ । राजमार्ग पूरै नछोपिएपनि गाडी चलाउन नसकिने अवस्था रहेको जिल्ला प्रहरी कार्यालय इलामले जानकारी दिएको छ ।
इलामसहित देशभर बुधबार बिहानदेखि निरन्तर वर्षा भइरहेको छ । मेची क्षेत्रको ‘लाइफ लाइन’ मानिने मेची राजमार्ग अवरुद्ध भएपछि इलाम, पाँचथर, ताप्लेजुङ र झापा प्रभावित भएका छन् ।
