सूर्योदय नगरपालिकाको तेस्रो चौमासिक सार्वजनिक सुनुवाई बिहीबार हुँदै

  नयाँ बुलन्द
35 Shares

इलाम : इलामको सूर्योदय नगरपालिकाको आर्थिक वर्ष २०८०।०८१ को तेस्रो तथा अन्तिम चौमासिक सार्वजनिक सुनुवाई बिहीबार हुने भएको छ ।

नगर कार्यपालिकाको कार्यालय र विभिन्न विषयगत शाखाहरुबाट भएका विकास निर्माण, सुशासन प्रवर्द्धन र सेवा प्रवाहको सम्बन्धमा बिहीबार नगर कार्यपालिकाको कार्यालय फिक्कलमा सार्वजनिक सुनुवाई कार्यक्रम हुन लागेको हो । कार्यक्रम नगर कार्यपालिकाको कार्यालयको प्राङ्गणमा विहान ११ बजेदेखि  हुनेछ ।

सूर्योदय नगरपालिकाको आयोजना र बुलन्द मल्टिटेक्निकल मिडिया प्रालिको संयोजन र सहजीकरणमा सार्वजनिक सुनुवाई संचालन हुनेछ ।

जनप्रतिनिधि तथा कर्मचारीहरूमा जवाफदेही संस्कार बसाउने एवम् दोहोरो संवादबाट जिम्मेवार अधिकारी र नागरिक बीचको दूरी कम गरी सेवा, वस्तु र सुविधा प्रदायक अधिकारी सहजकर्तामा रुपान्तरित भई सुशासनको प्रत्याभूति दिने उदेश्यले सार्वजनिक सुनुवाई कार्यक्रम गर्न लागेको हो ।

कार्यक्रममा नगरपालिकाको तर्फबाट नगरकार्यपालिकाको कार्यालय र विभिन्न विषयगत शाखाहरुबाट भएका विकास निर्माण, सुशासन प्रवर्द्धन र सेवा प्रवाह सम्बन्धमा भएका प्रगति प्रस्तुत हुनेछ ।

त्यस्तै बुलन्द मल्टिटेक्निकल मिडिया प्रालिका तर्फबाट ३० जना नागरिकसँग सार्वजनिक सेवा प्रदायक संस्थाबाट सेवा लिँदा प्रत्यक्ष अनुभव गरेका, भोगेका र देखेका कुराहरुलाई उल्लेख गरी लिएको नागरिक अभिमत प्रतिवेदन पत्रको नतिजा प्रस्तुत गर्नेछ ।

त्यस्तै नागरिक बडापत्रद्वारा गरिएका बाचा बमोजिम ३० जना सेवाग्राहीले सेवा सुविधाको प्राप्तिपछि कार्यालयबाट बाहिर निस्किने समयमा त्यहाँको सेवा सुविधाको विषयमा लिएको बहिर्गमन अभिमत प्रस्तुत गर्नेछ ।

नागरिक अभिमतबाट प्राप्त प्रतिक्रियामा आगामी दिनका लागि सुझावहरु र बहिर्गमन अभिमतबाट प्राप्त प्रतिक्रियामा राम्रो पक्षसँगै र सुधार गर्नुपर्ने विषयहरु समेत प्रस्तुत हुनेछ ।

त्यस्तै कार्यक्रममा सेवाग्राहीहरुले प्रत्यक्ष चासो, गुनासो, प्रश्न र सुझाव राख्नेछन् । नगरपालिकाको तर्फबाट नगरप्रमुख, उपप्रमुख, प्रमुख प्रशासकीय अधिकृत, शाखाका प्रमुखहरुले सेवाग्राहीको जवाफ दिनुका  साथै आगामी दिनमा सेवाप्रवाहलाई थप गुणस्तरीय बनाउने प्रतिवद्धता जनाउनेछन् ।

कार्यक्रमको प्रत्यक्ष प्रशारण रेडियो फिक्कल ९०.६ मेगाहर्ज, बुद्धवाणी एफएम ९५.७ मेगाहर्ज, नयाँ बुलन्द डटकमको अफिसियल फेसबुक पेज Nayabulanda.com र सूर्योदय नगरपालिकाको अफिसियल फेसबुक पेज  https://www.facebook.com/suryodayamun/ बाट हुनेछ ।

सार्वजनिक सुनुवाई कार्यक्रमले शासन सञ्चालनमा पारदर्शिता, नेतृत्वमा जवाफदेहिता र सार्वजनिक चासोका बिषयमा आम नागरिकहरूको सूचनामा पहुँचलाई मजबुत बनाउनुका साथै सार्वजनिक सेवा, वस्तु र निर्णय प्रक्रियामा आम नागरिकको सहभागितालाई प्रवर्द्धन गर्नेछ ।

तपाईको प्रतिक्रिया

सम्बन्धित समाचार