इलाम : इलामको माङसेबुङमा जारी १६ औं संस्करणको आत्मानन्द कपमा आज (सोमबार) गोलबजार स्पोर्टिङ क्लब सिराहा र पाहुना टिम एम.एफ.सी. दार्जिलिङ भारतबीच प्रतिष्पर्धा हुँदैछ ।
माङसेबुङ गाउँपालिका-५ प्रस्तावित आत्मानन्द रंगशालामा दिउँसो ३ बजे हुने अन्तिम क्वाटरफाइनलमा सिराहाले विदेशी टिम दार्जिलिङ भारतको सामना गर्नेछ । खेलको प्रत्यक्ष प्रशारण नयाँ बुलन्द डटकमबाट हुनेछ ।
यसअघि आइतबार भएको तेस्रो क्वाटरफाइनल खेलमा डिफेन्डिङ च्याम्पियन छथर गाउँपालिका तेह्रथुमलाई १-० गोलको अन्तरमा पराजित गर्दै सिरिजंगा स्पोर्टिक क्लब मोरङ सेमिफाइलन प्रवेश गरिसकेको छ । मोरङले अब मंगलबार हुने पहिलो सेमिफाइलनमा घरेलु टिम माङसेबुङ गाउँपालिकासँगको भेट पक्का गरेको छ ।
सिरिजंगाका लागि खेलको २८ औं मिनेटमा वान भर्सेज वानको पोजिसनमा धिमालले सहजै जाली चुमाएका थिए । उता ए डिभिजन लिग खेलेका बिजु भुजेल, अशोक खवास र अफ्रिकी खेलाडी पेपेलगायत खेलाडीको साथमा मैदान उत्रेको छथरले पाएको थुप्रै अवसर सदुपयोग गर्न नसक्दा पहिलो खेलबाट बाहिरियो ।
खेलको म्यान अफ दी म्याच विजेता टिम सिरिजंगाका धिमाल घोषित हुँदै नगद २ हजार पाँच सय रुपैयाँ प्राप्त गरे ।
विजेताले नगद ३ लाख ११ हजार १ सय ७० रुपैयाँ र उपविजेता टिमले नगद २ लाख ५ हजार १ सय ७० रुपैयाँ सहित ट्रफी र प्रमाणपत्र पाउनेछन् । त्यस्तै सर्वाधिक गोलकर्ता, उत्कृष्ट गोल रक्षक, उत्कृष्ट खेलाडी, उत्कृष्ट डिफेण्डर, उत्कृष्ट स्ट्राइगर, उत्कृष्ट मिडफिल्डर, उदयमान खेलाडी, अनुशासित खेलाडी, बेस्ट कोचलगायतलाई पनि उचित नगद पुरस्कारबाट सम्मान गरिने छ ।
फाइलन १७ मंसिरमा हुनेछ ।
किरात धर्मगुरु आत्मानन्द लिङदेनको ७० औँ जन्मोत्सवको अवसरमा आयोजित प्रतियोगितामा नेपाल, भारत र भुटानका ८ चर्चित फुटबल टिमको सहभागिता थियो ।
