इलाम : कृष्णसेन इच्छुक पत्रकारिता पुरस्कार २०८० बाट इलाम चुलाचुलीका पत्रकार देविप्रसाद पौडेल (देवेन्द्र) पुरस्कृत भएका छन् ।
प्रेस सेन्टर नेपाल इलामले स्थापना गरेको नगद पाँच हजार राशीको पहिलो पटकको पुरस्कार शनिबार पौडेलले पाएका हुन् ।
इलाम नगरपालिकाकी उपप्रमुख बिष्णुकुमारी लिम्बू दाहाल र नगर प्रवक्ता नुतनदेव दुलालले सम्मानपत्र र दोसल्ला ओडाएर सम्मान गरेका हुन् ।
पौडेल विगत ६ वर्षदेखि पत्रकारिता क्षेत्रमा क्रियाशील छन् । दमक अनलाइनबाट पत्रकारिता सुरु गरेका पौड्ल हाल इलाम टाइम्स अनलाइनमा कार्यरत छन् ।
प्रेस सेन्टरले इलामको हरेक वर्ष ग्रामीण क्षेत्रमा रहेर पत्रकारितामा क्रियाशिल पत्रकारलाई पुरस्कृत गर्ने गरी शहिद कृष्णसेन इच्छुकको नाममा पुरस्कार स्थापना गरेको हो ।
विसं २०५९ जेठ १३ गते प्रदर्शनीमार्गस्थित महेन्द्र पुलिस क्लबमा हिरासतमा रहेका बेला कृष्णसेन ‘इच्छुक’को हत्या भएको थियो। विसं २०१३ कात्तिकमा भारतको देहरादूनमा जन्मिएका इच्छुक जनादेश साप्ताहिकको सम्पादक रहेका थिए।
प्रेस सेन्टर इलामकी अध्यक्ष बुद्धमाया सोङ्मीको अध्यक्षतामा भएको कार्यक्रममा इलाम नगर उपप्रमुख दाहाल, प्रवक्ता दुलाल, प्रेस सेन्टरका प्रदेश अध्यक्ष विनोद घिमिरे, केन्द्रीय सल्लाहकार गणेश लम्साल, नेपाल पत्रकार महासंघ इलामका अध्यक्ष विप्लव भट्टराई, प्रेस चौतारी इलामका अध्यक्ष भीम चापागाई, नेपाल आदिवासी जनजाति पत्रकार महासंघ (फोनिज) की सहसचिव सिर्जना श्रेष्ठलगायतले मन्तव्य राखेका थिए ।
को हुन् कृष्णसेन इच्छुक ?
कृष्णसेन ईच्छुक नेपालका एक वरिष्ठ पत्रकार एवं साहित्यकार हुन्। प्रगतिशील धाराका साहित्यकार एवं क्रान्तिकारी धाराका पत्रकार इच्छुकको सशस्त्र जनयुद्धका क्रममा सैनिक हिरासतमा चरम यातना दिएर हत्या गरिएको थियो।
तात्कालीन नेकपा (माओवादी) ले सञ्चालन गरेको जनयुद्धमा मारिने उच्च तहका नेतामा इच्छुकको पनि नाम आउँछ। उनी नेपाली साहित्यिक एवं पत्रकारिताको क्षेत्रमा उज्जवल नक्षेत्र हुन्। यहाँ हामीले इच्छुकको जीवनी बुँदागत रुपमा प्रस्तुत गरेका छौं।
कृष्ण सेन ‘इच्छुक’ संक्षिप्त परिचय
नाम : कृष्ण सेन ‘इच्छुक’
जन्म : वि.सं. २०१३ कार्तिक ३
जन्मस्थान : भारतको देहरादून
आमा : भीमकुमारी सेन
बुवा : यमबहादुर सेन
पत्नी : तक्मा केसी
छोरी : समीक्षा केसी
शिक्षा : बीएड, एमए
आबद्धता :
अध्यक्ष, अखिल नेपाल जनसांस्कृतिक संघ
संयोजक, अ.ने.रा.स्व.वि.यु. केन्द्रीय समिति
क्षेत्रीय व्यूरो सदस्य, नेकपा (माओवादी)
केन्द्रीय पार्षद्, प्रगतिशील लेखक संघ, नेपाल
केन्द्रीय पार्षद्, नेपाल पत्रकार महासंघ
सदस्य, दक्षिण एसियाली क्षेत्रीय पत्रकार संघ
प्रकाशित कृतिहरु :
शोकाञ्जली (२०४८)
इतिहासको यस घडिमा (२०५५)
बन्दी र चन्द्रागिरि (२०५७)
सम्पादन :
कलम साहित्यिक त्रैमासिक,
जनादेश साप्ताहिक,
जनदिशा दैनिक, योजनालगायत
पुरस्कार :
साहित्य सन्ध्या (२०५७)
पारिजात सिर्जनशील साहित्य पुरस्कार (२०५९)
कृष्णमणि साहित्य पुरस्कार (२०५९)
प्रगतिशील साहित्य पुरस्कार (२०६१) मरणोपरान्त
प्रेस सेनानी पुरस्कार (२०६५) मरणोपरान्त
जेल जीवन :
दाङ कारागार (६ वर्ष)
भद्र बन्दीगृह (१ वर्ष)
सिराहा र राजविराज (२ वर्ष)
शहादत : वि.सं. २०५९ जेठ १३
(महेन्द्र पुलिस क्लबको हिरासतमा)
शहादतपछि प्रकाशित कृतिहरु :
कृष्ण सेन ‘इच्छुक’ स्मृति ग्रन्थ
इच्छुक रचनावली भाग १–३
कवि इच्छुक कविताका सन्दर्भमा
आस्था र निष्ठाका सतिसाल इच्छुक ।
