पाँचथरः उद्यमी महिला बहुउदेश्यीय सहकारी संस्थाद्वारा आयोजित दुई महिने सिलाई कटाई तालिम बुधबार समापन भएको छ ।
फाल्गुनन्द गाउँपालिकाको वडा नम्बर ५ मा २०७१ सालमा स्थापना भएको यस सहकारीले महिलालाई स्वरोजगार र आत्मनिर्भर बनाउने उदेश्यले तालिमको आयोजना गरेको संस्थाको अध्यक्ष दिलमाया चेम्जोङले जानकारी दिइन् । पालिकाको आर्थिक सहयोगमा २ महिना आगाडीदेखि संचालन गरिएको उक्त तालिमबाट वडाका ११ जना महिलाले सिप आर्जन गरेका छन् । तालिममा स्रोत र साधनले भ्याएसम्म प्रशिक्षार्थीहरुलाई सिलाई कटाई बारे सिकाएको उनले बताइन् ।
सहभागीलाई निर्मला देवी पौडेलले प्रशिक्षण दिएकी थिइन् । दैनिक ६ घण्टा भन्दा बढी तालिम सञ्चालन भएको जनाइएको छ । उनीहरुलाई मेसिन चलाउन,नापजाँच गर्न,कपडा कटिङ गर्न,सिलाई गर्न,फिनिसिङ गर्न लगायतका सिलाई कटाई सम्बन्धीका प्रारम्भिक कामहरु सिकाईएको प्रशिक्षक पौडेलको भनाई छ ।
समापन कार्यक्रममा प्रमुख अतिथि पालिका अध्यक्ष बृजहाङ आङ्देबेको विशेष अतिथ्यता प्रमुख प्रशासकिय अधिकृत,महिला तथा बालविकाश शाखाबाट रेजिना चापागाई लगायतको उपस्थिति थियो । सहभागीहरुलाई अतिथिहरुले प्रमाणपत्र प्रदान गरेका थिए ।
अतिथिले शुभकामना मन्तव्यमा सिकेका कुरालाई अब व्यवहारमा उतार्न र व्यवसायिक सिलाई कटाईको पेशा गर्न सहभागीलाई सल्लाह दिएका थिए । दुई महिने तालिमबाट आफुले सिलाई कटाई सम्बन्धी आधारभूत ज्ञान लिएको हुदाँ आगामी दिन अझै उच्च तहको तालिम उपलब्ध गराइ दिएमा झन् प्रभावकारी हुने सहभागीले बताएका छन् ।
तालिममा सहभागिहरुको उत्साहपूर्वक सहभागी देख्दा उनीहरुको सिक्ने इच्छा शक्ति प्रबल भएको प्रति आयोजक संस्था अत्यन्तै गौरवमय बनेको छ । यस संस्थाले महिलाको हित हुने हरेक तालिम,प्रशिक्षण,क्षमता विकाशका कार्यक्रम र विभिन्न क्रियाकलापसमेत गर्दै आएको जनाएको छ ।
