इलाम : इलामको रोङ गाउँपालिकामा मौरी पालन व्यवसाय फस्टाउँदै गएको छ । परम्परागत रुपमा हुँदै आएको मौरी पालन व्यवसायलाई गाउँपालिकाले किसानलाई आधुनिक प्रविधि र घार हस्तान्तरण गरेसँगै किसानको आकर्षण पनि बढेको हो ।
कम मेहेनतमा अर्गानिक उत्पादन र उच्च मूल्य पाउने भएपछि किसानहरुको आर्कषण मौरीपालनमा बढेको हो । स्थानीय सेरेना जातको मौरीबाट उत्पादित मह प्रतिकेजी १ हजारदेखि १ हजार २ सय रुपैयाँसम्म बिक्री हुने गरेको छ । यहाँ उत्पादित मह इलामको बजारका अतिरिक्त झापासँगै काठमाडौंसम्म र भारतमा समेत बिक्री हुने गरेको छ ।
चुरे क्षेत्रमा मौरीलाई चाहिने फुलजन्य बोटबिरुवा लगाउँदा भू–क्षय समेत नियन्त्रण हुने भएकाले चुरे संरक्षणसंगै किसानहरुको आम्दानी वृद्धि हुँदै आएको छ ।
खेतीवालीमा विषादि प्रयोग नहुने र खुल्ला चरिचरण भएको क्षेत्र मौरीको लागि उचित स्थान मानिन्छ । सरकारी तथ्यांकअनुसार इलामका २ हजार किसानले मौरीपालन गरेका छन् । इलाममा वार्षिक २२ मेट्रिक टन मह उत्पादन हुँदै आएको छ ।
