पाँचथरः पाँचथर जिल्लामा ६० प्रतिशत मतदान भएको जिल्ला निर्वाचन कार्यालय पाँचथरले प्रारम्भिक जानकारी दिएको छ ।
एक नगरपालिका सहित आठ स्थानीयतहका ६० वडा रहेको पाँचथरमा १ लाख ४० हजार २ सय २५ जना मतदाता रहेका छन् । यस जिल्लामा १ सय १ मतदान स्थल र १ सय ७६ मतदान केन्द्रमा शान्तिपूर्ण र उत्साहका साथ मतदान सम्पन्न भएको छ ।
स्थानीयतहको निर्वाचन सम्पन्न गर्न २ हजार १ सय सुरक्षाकर्मी र ९ सय ४ जना म्यादी प्रहरी खटाइएको सुरक्षा निकायले जनाएको छ । सबै क्षेत्रका मतपेटिका धमाधम पालिकाको केन्द्रमा रहेको निर्वाचन अधिकृतको कार्यालयमा बुझ्ने क्रम शुरु भएको र केही ठाउँमा साँझपख परेको बर्षातले ढुवानी गर्न असहज बनेको छ ।
