पाँचथरः प्रधानमन्त्री शेरबहादुर देउवाले पाँचथरको सुख्खाग्रस्त क्षेत्र तुम्बेवा गाँउपालिकामा निर्माणाधिन आङ्ना–मौवा बृहत पम्पिङ खानेपानी आयोजना’को सोमबार उद्घाटन गरेका छन् । उद्घाटन कार्यक्रममा देउवा सहित खानेपानीमन्त्री उमाकान्त चौधरी, एक नम्बर प्रदेशका आर्थिक मामिला तथा योजना मन्त्री इन्द्र आङ्बो र संविधानसभा सदस्य भिष्मराज आङ्देम्बे समेत उपस्थित भएका थिए ।
काम सम्पन्न नभई आयोजना उद्घाटन भएपछि पूर्णता पाउनेमा उपभोक्ताहरुले शंका गरेका छन् । हालसम्म ९५ प्रतिशत काम पुरा भएको उपभोक्ता समितिले दावी गरेको छ । तर उपभोक्ताहरु भने ८० प्रतिशत पनि काम पूरा नभएको बताउँछन् । ‘बल्ल पानी टेस्टिङ सुरु भएको थियो,’ स्थानीय डम्बरहादुर तामाङले भने ‘ आज उद्घटान रहेछ । यहाँ आएपछि थाहा भयो ।’ हाउस कनेक्सनको काम नभएको स्थानीयको भनाई छ ।
सुख्खाक्षेत्रको रुपमा रहेको तुम्बेवाका १६ सय चार घरधुरीका करिब आठ हजार मानिसलाई पानी पु¥याउने उद्धेस्यले आयोजना निर्माण गरिएको हो । कन्काई प्रेरणा जेभी निर्माण कम्पनीले ३० महिनामा सम्पन्न गर्ने गरी २०७४ असार २५ गते आयोजना निर्माणको जिम्मा लिएको थियो । दुई पटक थपिएको समयमा पनि निर्माण कम्पनीले काम सम्पन्न गरेको थिएन । काम पूरा नभई उद्घाटन गरेपछि स्थानीयहरुले शंका व्यक्त गरेका हुन् ।
निर्माणको काम अन्तिम चरणमा पुगेको आयोजना प्रमुख चन्द्रनारायण चौधरीको भनाई छ । ‘बिभिन्न समस्याका कारण निर्धारित समयमा काम सम्पन्न गर्न सकिएन,’ चौधरीले भने ‘समस्याका बाबजुद आयोजना निर्माणको काम अन्तिम चरणमा पुगेको छ । उद्घाटको काम उपभोक्ता समितिले गरेको हो ।’ उपभोक्ता समितिले भने काम अन्तिम चरणमा पुगेकाले उद्घाटन गरेको दावी गरेको छ । ‘कामले करिब पूर्णता पाएको हो,’ समितिका अध्यक्ष देबेन्द्र खत्रीले भने ‘बाँकी रहेको केही काम चाँडै पूरा हुन्छ ।’
१६ सय ४ घरधुरीमध्ये सात सय ५७ घरमा लागि हाउस कनेक्सनको काम पुरा भएको हो । बिद्युत् बिस्तार, गार्ड हाउस र ट्याङ्की निर्माणको काम सकिएको छ । सब ट्रान्समिसन लाइनको काम भईरहेको छ ।
तमोर नदीको लखुवा दोभानमा मुहान थापेर तुम्बेवा गाँउपालिकाका १ देखि ३ वडाका मानिसलाई पानी खुवाउने उद्धेस्यले आयोजनाको काम सुरु गरिएको हो ।-जोरपाटीबाट
