इलाम : इलाम माङसेबुङ–६ हाङतापा नागीकी १४ वर्षीया नुमा राई ‘द भ्वाइस किड्स’को उपाधि दौडमा छिन् । टिम मिलनमा रहेकी नुमा टप १६ बाट सबैभन्दा बढी भोट पाएर यो प्रतियोगिताको फाइनलमा पुगेकी हुन् । दर्शकको विश्वास र भोटको साथ पाएरै आफू फाइनलमा पुग्न सकेको नुमाले बताएकी छन् । यो प्रतियोगिताको उपाधि नै जिताउन पहिलेजसरी साथ दिन उनले दर्शक, शुभेच्छुकलाई आग्रह गरेकी छन् । टप ८ मा पुगेका प्रतिस्पर्धीबीच उपाधि भिडन्त भइरहेको छ । फाइनल माघ १ गते हुने जनाइएको छ ।
फाइनल प्रवेशका क्रममा उनले ‘देम सारो’ गीत गाएकी थिइन् । टप २४ बाट पनि उनी पहिलो नम्बरमै अघि बढेकी थिइन् । त्यस क्रममा उनले ‘दुई चुल्ठी बाटेर’, लाइभ राउन्डमा ‘डाली–डाली फूल फुल्यो’ गीत गाएर निर्णायक र दर्शकको मन जितेकी थिइन् । ‘सिरिमा सिरी’ गीत गाएर उनले ब्याटल राउन्ड पार गरेकी थिइन् । ब्लाइन्ड राउन्डमा ‘गोठालो जाँदा’ गीत गाएर कोच मिलन नेवारको मन जितेकी थिइन् ।
