काठमाडौं : स्वास्थ्य तथा जनसंख्या मन्त्रालयले चीनको वुहानबाट नेपाल ल्याइएका कुनैपनि व्यक्तिमा ‘कोरोनाभाइरस’को संक्रमण नरहेको जनाएको छ ।
मन्त्रालयले बुधबार पत्रकार सम्मेलन गरी गएको आइतबार नेपाल ल्याइएका १७५ जनामा पहिलोपटक गरिएको परीक्षणमा कोरोना नरहेको पुष्टि भएको जनाएको हो ।
भक्तपुरको खरिपाटीमा ‘क्वारेन्टाइन’मा राखिएका उनीहरुको फागुन ४, ५ र ६ गते घाँटी र नाकभित्रको स्वाबको नमुना संकलन गरी परीक्षण गरिएको थियो ।
टेकुस्थित राष्ट्रिय जनस्वास्थ्य प्रयोगशालामा गरिएको परीक्षणमा कसैमा पनि कोरोनाभाइरसको संक्रमण नभेटिएको मन्त्रालयका सचिव खगराज बरालले जानकारी दिए ।
क्वारेन्टाइनमा रहेको १४ दिनपछि पुनः प्रत्येक व्यक्तिको नाक र घाँटीभित्रको स्वाबको परीक्षण गरिने मन्त्रालयले जनाएको छ ।
‘नेपाल अझै जोखिममै’
मन्त्रालयका प्रवक्ता डा. महेन्द्र श्रेष्ठले नेपाल ल्याइएका कसैमा पनि कोरोनाभाइरसको संक्रमण नदेखिँदैमा नेपाल कोरोनामुक्त छ भन्न नमिल्ने बताए ।
अन्य देशमा पनि रोगको संक्रमण देखिएकाले नेपाल अझै जोखिममा नै रहेको उनले बताए ।