ताप्लेजुङ : ताप्लेजुङको सिरीजंघा गाउँपालिका वडा नं ४ पेदाङमा सडक खन्ने क्रममा माथिवाट पहरा खस्दा स्काभेटर पुरीएको छ । जोरपूलवाट पेदाङ जाने सडकको मोक्तूरा भिरमा सडक खन्ने क्रममा पहरा फुटेको हो ।
स्काभेटर संगै चालक सिन्धुलीका २४ वर्षिय विर वहादुर तामाङ पनि पुरीएको ताप्लेजुङ प्रहरी प्रमुख सञ्जयसिंह थापाले जानकारी दिए । स्काभेटरका सहयोगी भने भागेर ज्यान जोगाउन सफल भएको सिरीजंघा गाउँपालिका अध्यक्ष टिकाराम गुरुङले बताए ।
दुर्घटना विहान करिव साढे १० वजे भएको थियो । घटनास्थलमा उद्धारका लागि सुरक्षाकर्मी लगायतको टोली पुगेको भएपनि ठुल्टुला चट्टान भएका कारण स्काभेटरवाट मात्र पन्छाउन सकिने पेदाङका वडाध्यक्ष रुपदास भट्टराईले जानकारी दिए ।
गाउँपालिका अध्यक्ष गुरुङका अनुसार चालकका आफन्त पनि आउँदै छन् । पेदाङमा अहिले पानी परिरहेको वडाध्यक्ष भट्टराईले बताए ।
