इलाम : इलाम नगरपालिका ९ स्थित राहसल बाल अनाथलयको निर्माणाधीन भवनका लागि इलाम समाज बेलायतले सहयोग गर्ने भएको छ ।
विहीबार इलाममा आयोजित एक कार्यक्रममा समाजका सल्लाहकार गजेन्द्र कटुवालले भवन निर्माणका लागि सहयोग गर्ने प्रतिवद्धता जनाए । इलाममा जन्मिएर बेलायत बस्दै आएका कटुवालले १९ वर्षीय छोरा जेनिस कटुवालको जन्मदिनको अवसरमा आयोजित कार्यक्रममा त्यस्तो प्रतिवद्धता जनाए ।
उनले छोराको जन्मदिनमा नगद ५ हजार रुपैयाँ उपलब्ध गराएका छन् । अनाथालयका १५ बालवालिकालाई एक पटकको भोजनको लागि सहयोग गरेका हुन् ।
विभिन्न दाताको सहयोगबाटै अनाथलयको भवनको ४५ प्रतिशत काम निर्माण सम्पन्न भएको छ । भवनको पहिलो तला निर्माणाधीन छ ।
भवन निर्माणका लागि देशविदेशबाट विभिन्न संघ, संस्था तथा व्यक्तिहरुले सहयोग गरेका छन् । सहयोग आउने क्रम जारी रहेको भवन निर्माण स्रोत व्यवस्थापन समितिका संयोजक चन्द्रबहादुर हाङखिमले बताए ।
