काठमाडौं : राहत कोटाका शिक्षक र प्राथमिक बालविकास कार्यक्रमअन्तर्गत्का शिक्षकहरुले मंगलबारपनि राजधानीमा प्रदर्शन गरेका छन् ।
गत आइतबारदेखि राजधानीमा प्रदर्शन गर्दै आएका उनीहरुले आफूहरुको मागको सम्बोधन नगरी संघीय शिक्षा ऐन बनाउन लागेको गुनासो गरेका छन् ।
हाल राहत कोटामा ४० हजार र बालविकासमा ३७ हजार शिक्षक रहेको उनीहरुको दाबी छ ।
सरकारले गत असोज २२ गते राहत र प्राथमिक बालविकासका शिक्षकहरुको माग सम्बोधन गर्ने सम्झौता गरेको थियो ।
प्राथमिक बालविकासका शिक्षकहरुलाई पनि विद्यालय मातहत ल्याउनुपर्ने भन्दै उनीहरुले आफूहरु प्रतिस्पर्धामा आउनसमेत तयार रहेको बताएका छन् ।
मंगलबार माइतीघर मन्डलाबाट सुरु भएको उनीहरुको नाराबाजीसहितको प्रदर्शन नयाँबानेश्वर पुगेर कोणसभामा परिणत भएको थियो ।
