चितवन : देशभरका महिला पत्रकारहरु चितवन आउने भएका छन् । आउँदो माघ १५ र १६ गते महिला पत्रकारहरु चितवन आउने भएको हो ।
नेपाल पत्रकार महासंघको केन्द्रीय समितिका पत्रकार महिला, पूर्व कार्यसमिति, प्रदेश संरचनामा प्रतिनिधित्व गर्ने पत्रकार महिला, प्रत्येक जिल्ला शाखामा नेतृत्व तहमा रहेका तथा अग्रज पत्रकार महिलाहरु सहभागी हुने भेलालाई चितवन शाखाले पनि समन्वय गर्ने भएको छ ।
पत्रकार महिलाको भेलालाई भव्यताका साथ सम्पन्न गर्न नेपाल पत्रकार महासंघ चितवन शाखाले बुधबार जिल्लाका क्रियाशील पत्रकार महिला सँग छलफल गरेको छ । चितवनको पटिहानीमा आयोजना गरिने भेलामा अतिथि स्वागतदेखि कार्यक्रम समापनसम्म आवश्यक तयारी व्यवस्थापन विषयमा छलफल गरिएको हो । छलफलमा नेपाल पत्रकार महासंघका केन्द्रीय सदस्य कृष्ण गिरीले चितवनमा पत्रकार महिलाको संख्यात्मक र गुणात्मक क्रियाशिलता अरुको लागि नमूनाका रुपमा रहदैं आएको बताए ।
भेलालाई भव्यताका साथ सम्पन्न गर्न जिल्ला शाखासँगै पत्रकार महिलाको भूमिकासमेत महत्व राख्ने उनले जोड दिएका छन् । कार्यक्रममा जिल्ला शाखा चितवनका अध्यक्ष राधेश्याम खतिवडाले केन्द्रकै इतिहासमा पहिलोपटक हुन लागेको पत्रकार महिला भेलालाई चितवनमा सम्पन्न गर्न पाउनु गौरवको विषय भएको बताए। “चितवनको पर्यटकीय आकर्षणले पनि बढीभन्दा बढी सहभागिता रहने अपेक्षा गरिएको छ”, अध्यक्ष खतिवडाले भने, “चितवनमा हुने पत्रकार महिला भेलाले पत्रकारितासँगै चितवनको पर्यटकीय गतिविधिमा समेत प्रभाव छोड्ने गरी कार्यक्रम गर्नुपर्छ ।”कार्यक्रमलाई सफलतापूर्वक सम्पन्न गर्न जिल्ला कार्यसमितिलाई विभिन्न जिम्मेवारी दिई कामको बाँडफाँट गरिएको छ ।
जिल्लाका पत्रकार महिलाहरुले ती उपसमितिलाई सहकार्य गर्ने गरी छलफलमा ऐक्यबद्धता जनाएका छन् । पत्रकार महिलाको भेलामा देशभरबाट २ सय जनाको सहभागिता रहने बताइएको छ ।
