इलाम : नेपाल स्काउट क्षेत्र नम्बर ३ को दुई दिने क्षेत्रीय क्याम्प शनिबार सम्पन्न भएको छ ।
क्याम्पमा विभिन्न विधामा स्काउटका विद्यार्थीहरुलाई प्रतिष्पर्धा गराइएको थियो । ६ विद्यालयका २१६ स्काउट विद्यार्थी र १५ स्काउटर सहभागी रहेको क्याम्पमा सबैभन्दा बढी विधामा अमर ट्रुप बरबोटे उत्कृष्ट भएको थियो । यसैगरी बरबोटे बोर्डिङ्ग ट्रुप दोस्रो भएको थियो । तेस्रो नेपालटार ट्रुप साखेजुङ्ग भएको क्षेत्रीय संयोजक अर्जुन शर्माले जानकारी दिए ।
विजेता स्काउटका विद्यार्थी र सहभागीहरुलाई कार्यक्रमका प्रमुख अतिथि स्काउट इलामका जिल्ला आयुक्त कृष्णकुमार घलेले पुरस्कार र प्रमाण पत्र प्रदान गरेका थिए । समापन कार्यक्रममा सहभागी विद्यालयका अध्यक्ष, शिक्षकहरुको पनि उपस्थिति रहेको थियो ।
