गुरुङगाउँ : इलामको माङसेबुङ गाउँपालिका ३ स्थित गुरुङगाउँमा खुल्ला नकआउट फूटसल प्रतियोगितामा थुमथुमे कुरुम्बा र चिवुवा ए फाइनलमा प्रवेश गरेका छन् ।
विहीबार सम्पन्न सेमीफाइनलमा आफ्ना प्रतिष्पर्धी टिमलाई पाखा लगाउँदै उपाधिका लागि यी दुई टिमबीच प्रतिष्पर्धा हुने पक्का भएको हो ।
विहीबारको पहिलो सेमीफाइनलमा मानपुर एफसीलाई ३-१ पराजित गर्दै चिवुवा ए उपाधि नजिक पुगेको हो । त्यस्तै दोस्रो तथा अन्तिम सेमीफाइलनमा सिक्तेम्बा बीलाई ५-३ ले पराजित गर्दै थुमथुमे कुरुम्बा फाइनल प्रवेश गरेको हो ।
स्थानीय फाल्गुनन्द विकास संस्थाको आयोजनामा संचालित प्रतियोगिताको फाइनल शुक्रबार हुनेछ । प्रतियोगिताको विजेताले नगद २० हजार र उपविजेताले १० हजार रुपैयाँ सहित मेडल र प्रमाणपत्र प्राप्त गर्नेछन् । त्यस्तै सर्वाधिक गोलकर्ता र उत्कृष्ठ खेलाडीले समेत मेडल र प्रमाणपत्र प्रदान गरिने आयोजक समितिका सचिव प्रविन लिम्बूले जानकारी दिए ।
२२ कात्तिकदेखि संचालित प्रतियोगितामा इलाम र पाँचथरका विभिन्न ३२ टिमको सहभागीता थियो । प्रतियोगिता स्थानीय गुरुङगाउँ खेलमैदानमा भईरहेको छ ।
