इलाम : विभिन्न जिल्लाबाट आएका साहित्यीक श्रष्ठाहरुले इलाम सदरमुकाममा शुक्रबार विभिन्न रसका साहित्य सुनाए । कसैले हाँस्य, ब्यंग त कसैले माया प्रेममा आधारित भएर साहित्य प्रस्तुत गरे । बगैँचा रेष्टुरेन्टमा कार्यक्रम भएकाले ‘बगैँचा गजल’ नाम दिइएको थियो । कार्यक्रममा १४ जना साहित्यकारहरुलाई सृजना सुनाउने अवसर मिल्यो । इलाम बाहिरका ११ अनी इलामका शिशिर भट्टराई, प्रवेश निशेष र प्रतिभा पौडेलले साहित्य पस्किए ।
शिशिरका गजलका शेरले पाहुनालाई स्वागत पनि भयो । शेर यस्तो थियो ।
‘रिसाएर घुम्न आउ हसाउँछ इलामले
फकाएर घरजम यतै बसाउँछ इलामले’
उनका यि गजलसँगै इलाममा उपस्थित भएकाहरुले तालिले सवैलाई स्वागत पनि गरे । इलामको फरक आयाम र भानु प्रतिभा सरक्षण तथा साहित्य समिति इलामले संयोजन गरेको कार्यक्रममा लोकेन्द्र बञ्जरा, सुमन समारिका संगिता थापा, प्रदिप रोधन, इश्वर दहाल लगायतले सृजना प्रस्तुत गरेका थिए ।
साहित्यीक कार्यक्रमकै लागि पाँचथरको फिदिम तर्फ लागेका पाहुनाको स्वागत सँगै साहित्य सुन्न पाउँदा इलामका साहित्यकारहरु पनि खुसी थिए ।
टीका आत्रेयका छन्दमा रहेको गजल निकै मार्किक थियो । उनले साहित्य प्रस्तुत गर्दा धेरैले वाह, वाह दिए अनी मौन समर्थन पनि जनाए । उनका गजलका दुइ शेर यस्ता थिए ।
‘दुखे आज साँच्चै पुरानान कुराले
रहर बुझ्न थाले फुटेका चुराले ।
नआए हुने हुनेथ्यो कुनै चाडपर्व
बुबा खोज्न थाले मसिना भुराले ।’
इलाममा आएर साहित्य बाचन गरेकोमा कवि बिमल बैद्यले सवैलाई धन्यवाद पनि दिए ।
