इजिप्ट : इजिप्टको एक इलाका प्रहरी सुरक्षा जाँच चौकीमा आज भएको एक आक्रमणमा परी कम्तीमा आठ सुरक्षाकर्मीको मृत्यु र अन्य तीन जना नराम्ररी घाइते भएको इजिप्टको स्वास्थ मन्त्रालयद्वारा प्रकाशित एक विज्ञप्तिमा जनाइएको छ । राजधानी कायरोबाट करिब ६ सय किलोमिटर दक्षिणमा पर्ने ‘इजिप्ट्स न्यु भ्याली गभर्नोरेट’ सुरक्षा जाँच चौकीमा सरकारी सशस्त्र सेना तत्कालै पुगेर आक्रमणकारीहरुमध्ये दुईजनालाई घटनास्थलमै मारि दिएका छन् ।
साथै, अरु भगुवा आक्रमणकारीहरुलाई सैनिकहरुले निरन्तर खोजी गरिरहेको पनि जनाइएको छ । हालसम्म उक्त आक्रमणको कुनै पनि समूहले जिम्मा लिएको छैन । सन् २०१३ मा इजिप्टका इस्लामिक राष्ट्रपति मोहम्मद मोर्सीलाई सेनाले अपदस्थ गरेपछि सुरक्षा कर्मीमाथि हुने आक्रमण एक सामान्य घटनाको रुपमा विकसित हुँदै आएको छ ।
पहिला पहिला यस्ता आक्रमणहरु सिनाइ इलाकामा मात्र केन्द्रित हुने गरेकोमा बिस्तारै बिस्तारै राजधानी कायरोसहित देशका अन्य स्थानमा पनि सर्दै गएका छन् । गत ९ डिसेम्बरका दिन पनि विश्वविख्यात गिजा पिरामिड जाने राजमार्गमा पर्ने, कायरो नजिकै अवस्थित एक सुरक्षा जाँच चौकीमा भएको बम विस्फोटमा परी ६ प्रहरी अधिकारी घटनास्थलमै मारिएका थिए ।
